ԵՐԵՎԱՆ, 17 հունվարի./Նովոստի–Արմենիա/. Իմունային համակարգի առողջությունը գրեթե 70%-ով կախված է աղիների միկրոֆլորայի վիճակից, ընդ որում կարելի է այնպես անել, որ աղիների բջիջներն ավելի ակտիվ ու առողջ լինեն: Նման կարծիք են հայտնել Կալիֆոռնիայի համալսարանի գիտնականները, գրում է
medikforum–ը` հղում անելով Science–ին։
Գիտնականները կարծում են, որ անհրաժեշտ է օգտագործել մանրաթելային սնունդ։
Ամերիկացի հետզոտողները եկել են այն եզրակացության, որ սննդային մանրաթելերը լավագույն սնունդն են աղիների բակտերիաների համար: Երբ մանրաթելերը յուրացվում են աղիքային միկրոբիոմի կողմից, արտազատվում են նյութեր, որոնք բարելավում են մարմնի պաշտպանիչ ֆունկցիաները:
«Աղիքային բակտերիաները նախընտրում են մանրաթելային սնունդ: Երբ այն լուծվում է առաջանում են կարճ շղթայական ճարպաթթուներ, որոնք կարող են խթանել իմունային բջիջների ընկալիչները, դա ակտիվացնում է իմունային համակարգի հակամանրէային ռեակցիաները», - նշում են գիտնականները:
Մինչ այս եզրակացության գալը, հետազոտողներն ուսումնասիրել են, թե ինչպես են օրգանիզմում փոխազդում աղիքային միկրոօրգանիզմները, իմունային համակարգի բջիջները և կոլոնոցիտները (հաստ աղիքի լորձաթաղանթի բջիջները): Ըստ նրանց՝ մարդու պաշտպանությունը հիվանդություն առաջացնող պաթոգեններից մեծապես կախված է ռեզիդենտ բակտերիաների ակտիվությունից, որոնք գործում են կոլոնոցիտների հետ համատեղ։ Երբ մարդն օգտագործում է մանրաթելերով հարուստ սնունդ, կոլոնոցիտներն այնպես են անում, որ ռեզիդենտ բակտերիաները մաքսիմալ պաշտպանված լինեն և չմահանան։
Սննդային մանրաթելերի լավագույն աղբյուրներն են բուսական մթերքները՝ հատապտուղները, բանջարեղենն ու մրգերը, ընկույզը:–0–
