Ռուսաստանցիները փոխում են Վրաստան նախատեսված տուրերը` նախընտրելով այցելել Հայաստան
ԵՐԵՎԱՆ, 25 հունիսի./Նովոստի–Արմենիա/. Ռուս զբոսաշրջիկները սկսել են փոխել դեպի Վրաստան գնված տուրերը` նախընտրելով այցելել Թուրքիա, Հայաստան և Կիպրոս։ Այս մասին «Մոսկվա» լրատվական գործակալությանը տեղեկացրել է Ռուսաստանի տուրօպերատորների ասոցիացիայի գործադիր տնօրեն Մայա Լոմիձեն։
«Տուրօպերատորներն ուրբաթ օրվանից իրավունք չունեն վաճառել Վրաստան նախատեսված տուրեր։ Սակայն կան մարդիկ, ովքեր ավելի վաղ են գնել ճամփորդական ուղեգրերը, և հարց է ծագում` ի՞նչ անել։ Նրանք, ովքեր հասցնում են թռչել Վրաստան և վերադառնալ մինչև հուլիսի 8–ը (հուլիսի 8–ին դադարեցվում է ավիահաղորդակցությունը Վրաստանի և Ռուսաստանի միջև), գնում են, միջոցների վերադարձի հայտերը շատ քիչ են։ Իսկ ովքեր ունեն վերադարձի տոմսեր հուլիսի 8–ից հետո, փոխում են ուղղությունը` մեծ մասամբ վճարելով ավել գումար», – նշել է Լոմիձեն։
Նրա խոսքով, դեռևս առաջատարի դիրքում են Թուրքիան, Կիպրոսը, Հայաստանը։ Ոմանք հանձնում են ուղիղ չվերթերի տոմսերն ու վերցնում են տարանցիկ կամ ավելի ուշ ամսաթվով տոմսեր` համոզված լինելով, որ այս ամենը շուտով կավարտվի։ Գումարի ամբողջական վերադարձի հայտերը քիչ են։
«Տուրօպերատորների այն հաճախորդները, ովքեր պարզապես ցանկանում են վերադարձնել գումարը չօգտագործված ուղեգրերի համար, պետք է սպասեն առնվազն երկու շաբաթ», – նշել է Լոմիձեն։
Նա նաև ավելացրել է, որ հիմա հայտնի չէ, թե որքան ռուս զբոսաշրջիկ է մնացել Վրաստանում, նախորդ հանգստյան օրերին նրանց թիվը մոտ 5 հազար էր։
Հունիսի 20–ին մի քանի հազար ցուցարարներ հավաքվել են Թբիլիսիի կենտրոնում` խորհրդարանի շենքի մոտ, պահանջելով ՆԳ նախարար Գեորգի Գախարիայի ու խորհրդարանի խոսնակ Իրակլի Կոբախիձեի հրաժարականը։ ՏԱՍՍ–ի տվյալներով, ցուցարարները փորձել են գրոհել խորհրդարանի շենքը, ոստիկանությունը ցրել է ցույցը` կիրառելով արցունքաբեր գազ, ռետինե փամփուշտներ և ջրցան մեքենաներ։
Հանրահավաքի պատճառը հունիսի 20–ին, Ուղղափառության միջխորհրդանական վեհաժողովի նիստի ժամանակ գրանցված միջադեպն է։ Վեհաժողովի նախագահը ՌԴ Պետդումայի անդամ Սերգեյ Գավրիլովն է։ Վեհաժողովի բյուրոյի հետ վրացի կազմակերպիչների նախնական պայմանավորվածության համաձայն, նիստը պետք է վարեր կազմակերպության քարտուղարներից մեկը, սակայն անսպասելիորեն Վրաստանի խորհրդարանի խոսնակի աթոռը զբաղեցնում է Սերգեյ Գավրիլովը։ Նա ռուսերեն դիմում է հավաքվածներին։
«Եվրոպական Վրաստան» կուսակցության ընդդիմադիրների կարծիքով, Սերգեյ Գավրիլովի նախագահությունը թբիլիսյան վեհաժողովում վիրավորական է։ Ընդմիջման ժամանակ ընդդիմադիրները զբաղեցնում են նախագահության ողջ տարածքն ու թույլ չեն տալիս պարոն Գավրիլովին կրկին նստել աթոռին։ Վեհաժողովի նիստը դադարեցվում է անորոշ ժամանակով։ Մոսկվայի ժամանակով ժամը 19։00–ին Սերգեյ Գավրիլովն ու Պետդումայի մյուս պատգամավորները վերադառնում են Թբիլիսիից։
Հաջորդ օրը Վրաստանի խորհրդարանի շենքի մոտ կազմակերպվել էր ամբողջովին այլ ակցիա, փողոց էին դուրս եկել երիտասարդները։ Նրանք պահանջում էին ՆԳ նախարարի հրաժարականն ու համամասնական համակարգով խորհրդարանական ընտրությունների անցկացում։
Միաժամանակ ՌԴ նախագահ Վլադիմիր Պուտինը հրամանագիր է ստորագրել ՌԴ քաղաքացիների անվտանգության ապահովման մասին Թբիլիսիում գրանցված անկարգությունների պատճառով։ Հրամանագրի համաձայն, հուլիսի 8–ից արգելվում է ուղևորային չվերթերի իրականացումը դեպի Վրաստան։ Կառավարությանը հրամանագրի շրջանակում հանձնարարվել է ապահովել Վրաստանում գտնվող ՌԴ քաղաքացիների և նրանց բեռի օպերատիվ վերադարձը։–0–
