ԵՐԵՎԱՆ, 26 հունվարի./Նովոստի–Արմենիա/. Պետդուման երեքշաբթի նիստի ժամանակ վերջնական` հիմնական ընթերցմամբ ընդունել է օրինագիծ` ՌԴ տարածքում գտնվող առանց քաղաքացիության անձանց համար 10 տարի ժամկետով անձը հաստատող ժամանակավոր վկայականների ներդրման մասին, հաղորդում է
ՏԱՍՍ–ը։
«ՌԴ–ում օտարերկրյա քաղաքացիների իրավական կարգավիճակի մասին» օրենքը լրացվում է նորմով առանց քաղաքացիության մարդկանց անձը հաստատող ժամանակավոր վկայականի մասին։ Այն ենթադրում է «փաստաթուղթ, որը տրվում է քաղաքացիություն չունեցող անձին, այն հաստատում է նրա անձն ու ժամանակավոր բնակությունը ՌԴ տարածքում»։
«Քաղաքացիություն չունեցող մարդու անձը հաստատող ժամանակավոր վկայականը ՌԴ–ում չի կարող տրվել էլեկտրոնային փաստաթղթի ձևաչափով», – նշվում է օրինագծում։
Երկրորդ ընթերցմամբ ընդունված փոփոխություններով պարզաբանվում է, որ նման վկայականը տրամադրվում է այն անձանց, որոնց փաստաթղթերը չեն ճանաչվում ՌԴ–ում և «այն պետության բացակայության դեպքում, ուր առանց քաղաքացիության անձը կարող է մեկնել ՌԴ–ից` կացության իրավունքի առկայության» կամ ՌԴ–ից արտաքսվելու դեպքում։ Վկայականի տրամադրման դիմումը ներկայացվում է ՌԴ ՆԳՆ տարածքային մարմին, վկայականը տրամադրվում է 10 աշխատանքային օրում։ Նման վկայական ունեցողները կարող են աշխատել ՌԴ–ում` առանց աշխատանքի թույլտվության փաստաթղթերի։
«Առանց քաղաքացիության անձին ժամանակավոր վկայականը տրամադրվում է 10 տարով», – նշվում է տեքստում։
Քաղաքացիություն չունեցող անձը պետք է վկայականի ժամկետի լրանալուց 10 աշխատանքային օրվանից ոչ ուշ դիմի ՆԳՆ մարմին` վկայականը փոխարինելու համար։
Օրինագծում նշվում է, որ նման վկայականը կլուծարվի, եթե դրա սեփականատերը ստանա օտարերկրյա քաղաքացիություն կամ կացության իրավունք այլ երկրում։ Նման դեպքում այդ անձը պետք է հեռանա երկրից 15 օրում։ Միաժամանակ վկայականի լուծարման դեպքում անձին տրամադրվում է տեղեկանք, որպեսզի այն ներկայացվի անձին ընդունող պետության դեսպանատուն։
Այս պահին օրենսդրությամբ նախատեսվում է օտարերկրացու կամ քաղաքացիություն չունեցող մարդու անձի հաստատման հատուկ ընթացակարգ։ Միաժամանակ օրենքներով նախատեսված չէ փաստաթուղթ, որը կհաստատի քաղաքացիություն չունեցող մարդու անձը և կտրամադրվի նրա անձը հաստատելուց հետո` ընդունված նորմերին համապատասխան։–0–