ԵՐԵՎԱՆ, 22 նոյեմբերի./Նովոստի–Արմենիա/. Հայաստանում, հատկաես կորոնավիրուսի պայմաններում լայնորեն տարածվել է հակաբիոտիկների օգտագործումը, ինչը լուրջ մտահոգության առիթ է դարձել:
Այս մասին նշեց ԱՆ հիվանդությունների վերահսկման և կանխարգելման ազգային կենտրոնի վարակիչ և ոչ վարակիչ հիվանդությունների համաճարակաբանության վարչության պետ Ռոմելլա Աբովյանը:
Նրա խոսքով, ուսումնասիրությունները ցույց են տվել, որ 2020-2021 թ.-ին գերակշռել է «Ազիտրոմիցին», ինչպես նաև հակասնկային «Ֆլուկոնազոլ» դեղամիջոցների օգտագործումը: Պատճառը, ըստ մասնագետի, կորոնավիրուսի տարածումն էր:
Загружается новость ... "Лево"
«Հակաբիոտիկների չարաշահման արդյունքում մանրէները ձեռք են բերում կայունություն: Կարող է գալ մի ժամանակ, երբ սպառվի հիմնական հակաբիոտիկների խումբը և սովորական, տարրական վարակիչ հիվանդության պարագայում մենք չկարողանանք օգնել հիվանդներին, և լինեն մահվան դեպքեր: Վիրուսային հիվանդությունները հակաբիոտիկներով չեն բուժվում»,- ասաց Ռոմելլա Աբովյանը:
Նա նշեց նաև, որ հակաբիոտիկների կիրառումը լուրջ խնդիր է թե՛ Հայաստանում, թե՛ ամբողջ աշխարհում։
«ԱՀԿ-ն բազմիցս հորդորել է, ՀՀ առողջապահության նախարարությունն էլ իր հերթին հանդես է եկել հայտարարությամբ, որպեսզի հակաբիոտիկներին զուգահեռ չկիրառվի մասնավորապես «Ֆլյուկոնազոլ» դեղամիջոցը»,-ասաց Աբովյանը։
Մասնագետը նաև հորդորեց համաքաղաքացիներին հակաբիոտիկներ ընդունել միայն բժշկի նշանակմամբ և խիստ անհրաժեշտ դեպքերում:
ՀՀ առողջապահության նախարարության ընտանեկան բժշկության գծով խորհրդատու Սամվել Հայրումյանի խոսքով էլ, երբ նոր էր սկսել համավարակը, սկզբում նույնիսկ ուղեցույցով «Ազիտրոմիցին» հակաբիոտիկն ընդգրկված էր հիմնական նշանակվող դեղերի մեջ: Որոշ ժամանակ անց պարզվել է, որ դրա նշանակումն արդյունավետ չէ:
«Ուսումնասիրությունները ցույց են տվել, որ կորոնավիրուսային թոքաբորբերի մեծ մասի դեպքում բորբոքումը պայմանավորված է միայն վիրուսով, հետևաբար հակաբիոտիկ նշանակելու կարիք չկա: Գրեթե 10%-ի դեպքում է հակաբիոտիկի կարիք լինում, երբ կա երկրորդային բակտերիալ վարակի միանալու հանգամանք»,- ասաց փորձագետը:
Սամվել Հայրումյանի խոսքով՝ քաղաքացիներից շատերը «թոքաբորբ» բառը լսելուն պես շտապում են դեղատուն՝ ամենաուժեղ հակաբակտերիալ դեղամիջոցը գնելու:
«Կորոնավիրուսային թոքաբորբերի ժամանակ` գրեթե 90 դեպքերում, բորբոքումը պայմանավորված է միայն վիրուսով, հետևաբար հակաբիոտիկ նշանակելու կարիք չկա»,- նշեց Հայրումյանը։
Ռոմելլա Աբովյանն էի իր հերթին հավելեց, որ ՀՀ առողջապահության նախարարությունը որոշ խմբի հակաբիոտիկների համար սահմանել է պարտադիր պահանջ՝ դուրս գրել միայն դեղատոմսով:
Ինչ վերաբերում է վերահսկողությանը, Աբովյանը նշեց, որ դա նախարարության լիազորությունից դուրս է: Կան համապատասխան տեսչական մարմիններ, որոնք այդ վերահսկողությունն իրականացնում են:–0–
