ԵՐԵՎԱՆ, 2 օգոստոսի. /Նովոստի-Արմենիա/. Sanitek ընկերությունը պատրաստ է ներդնել 4մլն դոլար Երևանում «աղբահանության ճգնաժամը» լուծելու համար: Այդ մասի ուրբաթ կայացած մամուլի ասուլիսին տեսակապի միջոցով հայտարարեց ընկերության տնօրեն Նիկոլաս Էլ Թավիլը:
Նա հայտնեց, որ խնդիրը լուծելու երկու տարբերակ կա` կարճաժամկետ և երկարաժամկետ:
«Մենք առաջարկում ենք կարճաժամկետ տարբերակը, քանի որ քաղաքապետարանն արդեն ձեռք է բերել նոր աղբահավաք մեքենաներ և աղբամաններ: Նոր մեքենաների ձեռքբերմամբ հպարտանալու և ընկերությանը մեղադրելու, հետո աղբը հավաքելու և հերոս դառնալու փոխարեն ավելի լավ է համախմբել ուժերը և լուծել աղբահանության հետ կապված խնդիրը», - ասաց նա:
Загружается новость ... "Лево"
Այնուհետև ընկերության տնօրենը ներկայացրեց երկարաժամկետ ծրագիրը։
«Մենք պատրաստ ենք ներդնել միանգամից 4 մլն դոլար` նոր աղբահավաք մեքենաների և աղբամանների ձեռքբերման համար: Ամեն տարի գումար ներդնել 500 նոր աղբամանների ձեռքբերման համար, հնարավորության դեպքում արդիականացնել ավտոպարկը: Պատրաստ ենք ներդնել կորպորատիվ կառավարման սկզբունքները և հաշվետվողականությունն ապահովելու համար ներկայացնել քաղաքապետարանին հորիզոնական մոնիտորինգի համակարգը», - ասաց Էլ Թավիլը:
Նա հայտնեց նաև, որ ընկերությունը պատրաստ է առկա ֆինասական պարտավորությունների վերակազմավորմանը:
Այնուհետև Էլ Թավիլը հավելեց, որ հաջողության հնարավոր է հասնել միայն այն դեպքում, եթե քաղաքապետարանը մշակի և ներդնի աղբահանության միջոցառումների քաղաքանություն և ծրագիր, արդիականացնի Նուբարաշենի աղբանոցի ենթակառուցվածքը:
Ընկերությունը պահանջում է նաև վերանայել պայմանագրի պայմանները և վերադարձնել, ըստ իրենց, անօրինական տուգանքների վրա ծախսված միջոցները:
Ավելի վաղ Sanitek International ընկերությունը հայց է ներկայացրել Երևանի քաղաքապետարանի դեմ։ Հայցի գումարը կազմում է 24 702 187.6 դրամ (մոտ 51,784 դոլար)։
Երևանի քաղաքապետ Հայկ Մարությանը հրապարակային կերպով դժգոհություն է հայտնել Sanitek–ի աշխատանքից` ընդգծելով, որ երևանցիներն այլևս չեն պատրաստվում հանդուրժել նման որակի աշխատանք։
Այս տարվա գարնանը Sanitek–ը երկու անգամ տուգանվել է Երևանում աղբահանության ոլորտում ստանձած պարտավորությունները չկատարելու համար (ապրիլի 15–ին` 13մլն դրամով և մայիսի 3–ին ` 26 մլն դրամով)։–0–
