Դատապարտված օտարերկրացիներն այլևս կարող են աշխատել Հայաստանում
ԵՐԵՎԱՆ,24 հոկտեմբերի. /Նովոստի-Արմենիա/. ՀՀ ԱԺ պատգամավորները հինգշաբթի երկրորդ և վերջնական որոշմամբ ընդունեցին փոփոխությունները «Օտարերկրացիների մասին» օրենքում:
Փոփոխությունները միտված են դատված օտարերկրյա, ինչպես նաև պրոբացիոն համակարգի շահառուներ հանդիսացող քաղաքացիների աշխատանքային գործունեության և զբաղվածության ապահովման հետ կապված դժվարությունների հաղթահարմանը:
Ըստ գործող օրենքի, օտարերկրյա քաղաքացիները Հայաստանում կարող են աշխատել միայն հատուկ թույլտվության հիման վրա, իսկ բացառությունները չեն տարածվում նախկինում դատապարտված անձանց և պրոբացիոն համակարգի շահառուների վրա:
Օրինագիծն ամբողջությամբ վերացնում է բոլոր խտրական ռիսկերը Հայաստանում օտարերկրացիների աշխատանքային գործունեության համար: Այսօրվա դրությամբ Հայասանում գրանցված են 148 դատապարտված օտարերկրյա քաղաքացիներ, որոնցից 10-ը` պրոբացիոն համակարգի շահառուներն են:-0-
