ԵՐԵՎԱՆ, 20 մայիսի. /Նովոստի-Արմենիա/. Ավտոբուսի պայթյունից տուժած, «Թումո» ստեղծարար տեխնոլոգիաների կենտրոնի 14 և 15-ամյա սաները, երկար բուժումից և վերականգնողական մի քանի վիրահատություններից հետո, ինքնուրույն քայլերով են տուն գնացել, հաղորդում է ՀՀ ԱՆ մամուլի ծառայությունը:
Հաղորդագրության համաձայն, Հալաբյան փողոցում տեղի ունեցած ավտոբուսի պայթյունի հետևանքով տուժածները, բժիշկների երկարատև և քրտնաջան աշխատանքի շնորհիվ, ապաքինվել են։ Բոլորը ստացել են անհրաժեշտ բուժում։ Պատահարից տարբեր վնասվածքներ ստացած քաղաքացիների, առավելապես` բազմակի, ծանր վնասվածքներ ստացած 14 և 15 տարեկան պատանիների բուժումը գտնվել է ՀՀ առողջապահության նախարարի ամենօրյա ուշադրության ներքո։
Մասնագետների գնահատմամբ` հաշվի առնելով, որ նրանց լուրջ բարդություններ էին սպառնում` անցած 25 օրում աննախադեպ դրական արդյունքներ են արձանագրվել։
Առաջին բժշկական օգնությունն «Արմենիա» հանրապետական բժշկական կենտրոնում ստանալուց հետո, տղաները տեղափոխվել են «Սուրբ Աստվածամայր» բժշկական կենտրոն։ 25 օրվա ընթացքում բուժական անհարժեշտ բոլոր, լայնածավալ աշխատանքների արդյունքում, ծայրահեղ ծանր, շոկային վիճակից նրանք դուրս են եկել։ Վերականգնողական մի քանի վիրահատությունների շնորհիվ` պատանիների մոտ այսօր որևէ ֆունկցիայի խանգարում չկա, քայլում են:
Ռոլանդ Խոջոյանը և Էդգար Գասպարյանը ուրբաթ դուրս են գրվել «Սուրբ Աստվածամայր» բժշկական կենտրոնից։ Նրանց առողջական վիճակը որոշ ժամանակ կգտնվի «Սուրբ Աստվածամայր» ԲԿ-ի հսկողության ներքո։
«Տղաները շտապում էին տուն` խոստովանելով, որ կարոտել են ընտանեկան ջերմությունը, իսկ մայրիկները, հազիվ զսպելով հուզմունքը, խոսքեր չէին գտնում բուժանձնակազմին իրենց երախտիքը հայտնելու համար», - հայտնել են գերատեսչության մամուլի ծառայությունից։
Առողջապահության նախարարությունից նաև հայտնում են, որ ավտոբուսի պայթունի հետևանքով բոլոր տուժածներն ապաքինված դուրս են գրվել։
Ապրիլի 25–ին ժամը 21։51–ի սահմաններում ահազանգ է ստացվել, որ Հալաբյան փողոցում` «Թումո» ստեղծարար տեխնոլոգիաների կենտրոնից ոչ հեռու, N63 ավտոբուսում պայթյուն է տեղի ունեցել։ Ճշտված տվյալներով, ավտոբուսի պայթյունի հետևանքով երկու մարդ է զոհվել, յոթ տուժածներ հոսպիտալացվել են, այդ թվում` անչափահասներ և հղի կին։–0–