ՄԱԿ–ի հատուկ զեկուցողը մտահոգություն է հայտնել Երևանում համասեռամոլների ֆորումի ձախողման պատճառով
ԵՐԵՎԱՆ, 16 նոյեմբերի. /Նովոստի–Արմենիա/. ՄԱԿ–ի մարդու իրավունքների հարցերով փորձագետ, հատուկ զեկուցող Կլեմենթ Նյալեթսոսի Վուլը (Clément Nyaletsossi Voule) հայտարարել է, որ մտահոգ է Արևելյան Եվրոպայի և Կենտրոնական Ասիայի ԼԳԲՏ–քրիստոնյաների 11–րդ ֆորումը ձախողման կապակցությամբ, որը պետք է անցկացվեր Երևանում։
Արևելյան Եվրոպայի և Կենտրոնական Ասիայի ԼԳԲՏ–քրիստոնյաների 11–րդ ֆորումը պետք է անցկացվեր Երևանում այս տարվա նոյեմբերի 15–18–ը։ Այս տեղեկատվությունը մեծ հասարակական արձագանք ստացավ։ Այս հարցի շուրջ իրենց դիրքորոշումն էին հայտնում ոչ միայն հասարակական և քաղաքական տարբեր շերտերի ներկայացուցիչներ, այլև Հայ Առաքելական Եկեղեցու Գերագույն հոգևոր խորհուրդը։ ՀՀ ոստիկանապետ Վալերիյ Օսիպյանը նոյեմբերի 6–ին հայտարարեց, որ համասեռամոլների ֆորումը Երևանում չի անցկացվի անվտանգության նկատառումների պատճառով։
«ՀՀ կառավարությունը պետք է երաշխավորի միջոցառումների անցկացման անվտանգությունը մի մթնոլորտում, որը բացառում է ցանկացած խտրականություն։ Ես տեղեկացա ֆորումի չեղարկման մասին կրոնական, ԼԳԲՏ և այլ փոքրամասնությունների իրավունքների պաշտպանության ոլորտում գործող հասարակական կազմակերպությունների և քաղաքացիական նախաձեռնությունների ներկայացուցիչների հետ հանդիպման ժամանակ», – հայտարարեց Վուլն ուրբաթ ասուլիսի ժամանակ։
Նրա խոսքով, նա մտահոգ է այն փաստի կապակցությամբ, որ ֆորումի չեղարկումը բացատրվում է նրա մասնակիցների անվտանգության մտահոգություններով։
Վուլը տեղեկացրեց, որ ֆորումի չեղարկման հարցը բարձրացրել է ՀՀ կառավարության ներկայացուցիչների հետ հանդիպման ժամանակ։
«Կոչ եմ անում կառավարությանը ձեռնարկել անհրաժեշտ բոլոր քայլերն` ապագայում նմանատիպ իրավիճակների կրկնությունից խուսափելու համար։ Եթե կազմակերպությունը չի կարողանում միջոցառումն անցկացնել բարենպաստ պայմաններում, ապա պետությունը պարտավոր է ապահովել նրա մասնակիցների անվտանգությունը, հատկապես եթե այն անցկացվում է ռիսկային խմբի ներկայացուցիչների կողմից», – նշեց Վուլը` հավելելով, որ նման միջոցառումները պետք է ակտիվորեն անցկացվեն, իսկ պետությունը պետք է պայքարի թշնամանքի և խտրականության դեմ։–0–
