ԵՐԵՎԱՆ, 27 հոկտեմբերի․/Նովոստի-Արմենիա/․ ԱՄՆ նախագահ Դոնալդ Թրամփը խոստացել է կարգավորել ԼՂ հակամարտությունը։ Նյու Հեմփշիրում իր կողմնակիցների առջև ելույթ ունենալիս՝ առաջնորդը վստահություն է հայտնել, որ դա բավական հեշտ կլինի, չնայած տարածաշրջանում հակամարտությունը շարունակվում է շուրջ 30 տարի, հաղորդում է Газета.ру-ն։
Թրամփը խոսել է այդ մասին՝ ամբոխի մեջ տեսնելով մի քանի մարդու՝ Հայաստանի դրոշներով։
«Ես սա «թեթև դեպք եմ» կոչում։ Մենք կլուծենք դա։ Գնացեք և ասեք ձեր ժողովրդին․․․ Դա հեշտ է, եթե գիտես, թե ինչ ես անում»,- նշել է նախագահը։
Նրա խոսքով, Սպիտակ տունն աշխատում է այդ հարցի շուրջ և լիարժեք կարող է հաջողության հասնել, քանի որ արդեն կարգավորել է հակամարտությունը Սերբիայի և չճանաչված Կոսովոյի միջև, ինչպես նաև օգնել է Մերձավոր Արևելքում խաղաղության հաստատման մեջ։
«Նայեք հայերին, նրանք հրաշալի մարդիկ են։ Նրանք կռվում են, ասես դժոխքում։ Եվ դուք գիտեք, թե ինչ ենք մենք պատրաստվում անել։ Մենք կլուծենք այդ խնդիրները, մենք կուղղենք դա»,- շարունակել է Թրամփը։
ԱՄՆ նախագահը նույնպես հիշեցրել է իր կողմնակիցներին, որ իրեն 3 անգամ առաջադրվել է խաղաղության Նոբելյան մրցանակի, և նա հաստատապես պետք է ստանա դա նվազագույնը Սիրիայում իր գործողությունների համար։ -0-