«Արևելյան գործընկերության» երկրները պետք է ընդհանուր օրակարգով հանդես գային ԵՄ–ի և Ռուսաստանի վերաբերյալ

ԵՐԵՎԱՆ, 23 դեկտեմբերի. /Նովոստի–Արմենիա/. «Արևելյան գործընկերության» երկրները պետք է ընդհանուր օրակարգով հանդես գային Եվրամիության և Ռուսաստանի վերաբերյալ, կարծում է «Եվրոպական ինտեգրացիա» ՀԿ ղեկավար Կարեն Բեքարյանը։

Ըստ նրա` ԵՄ–ի և Ռուսաստանի միջև բուֆերային գոտում գտնվող, եվրաինտեգրման գործընթացում առավել մեծ առաջընթաց ունեցած երկրները` Հայաստանը, Վրաստանը, Ուկրաինան և Մոլդովան, կանգնած են ընդհանուր մարտահրավերների առջև և ընդհանուր հնարավորություններ ունեն։

«Այդ ամենը մեզ ցույց տվեց, որ երկրում էլ որ գտնվենք, մենք մեկ մեծ բացթողում ունենք. եթե մենք կարողանայինք որևէ հարցում համատեղ օրակարգով միասին ելույթ ունենալ` ինչպես ԵՄ–ի, այնպես էլ ՌԴ–ի վերաբերյալ, ես կարծում եմ, որ այդ երկրներից յուրաքանչյուրն առավել շահավետ իրավիճակում կհայտնվեր` կապված այդ ինտեգրացիոն հարցերի ամբողջ շրջանակի հետ»,–«Նովոստի» միջազգային մամուլի կենտրոնում հրավիրված ասուլիսի ժամանակ նշեց Բեքարյանը։

Սակայն, ըստ փորձագետի, պետությունները դեռ չեն հասել այդ մակարդակին և «յուրաքանչյուր երկիր իր քթից այն կողմ ոչինչ չի տեսնում»։

Սեպտեմբերի 3-ին Հայաստանի և Ռուսաստանի նախագահներ Սերժ Սարգսյանի և Վլադիմիր Պուտինի բանակցություններից հետո հայտարարվել է, որ Հայաստանը միանալու է Մաքսային միությանը և հետագայում ներգրավվելու է Եվրասիական տնտեսական միության ձևավորման գործընթացում։ ՄՄ Հայաստանի մուտքի ճանապարհային քարտեզը կստորագրվի դեկտեմբերի 24–ին Մոսկվայում կայանալիք Եվրասիական ինտեգրացիոն միության նիստի ժամանակ։ –0–