ԵՐԵՎԱՆ, 7 հուլիսի./Նովոստի-Արմենիա/. Կալանավորվել է «Ծառուկյան» խմբացության նախկին պատգամավոր Վանիկ Ասատրյանը: Այս տեղեկությունը «Նովոստի-Արմենիա» գործակալությանը հաստատել է ԱԱԾ մամուլի ծառայության ղեկավար Արթուր Գևորգյանը:
ԶԼՄ-ներում լուրեր էին շրջանառվում, որ Ասատրյանը կալանավորվել է ընտրակաշառքի վերաբերյալ քրեական գործով, որով նաև մեղադրանք է առաջադրվել «Բարգավաճ Հայաստան» կուսակցության առաջնորդ Գագիկ Ծառուկյանին:
Հիշեցնենք, որ ԱԱԾ-ի կողմից բացահայտվել են 2017 թ.-ին ԱԺ ընտրությունների ժամանակ ԲՀԿ–ի կողմից ընտրողներին կաշառք տալու, կաշառք ստանալու հարյուրավոր դեպքեր: Հունիսի 16-ին ԱԺ-ն բավարարել է դատախազության կողմից ներկայացված միջնորդությունը՝ Ծառուկյանին պատգամավորական անձեռնմխելիությունից զրկելու վերաբերյալ: Սակայն հունիսի 21-ին Առաջին ատյանի դատարանը մերժել է Ծառուկյանին կալանավորելու վերաբերյալ դատախազության միջնորդությունը:
Վանիկ Ասատրյանը 2017 թվականին ապրիլի 2-ին ԱԺ պատգամավոր էր ընտրվել «Ծառուկյան» կուսակցությունների դաշինքի թիվ 9 ընտրատարածքի տարածքային ընտրական ցուցակով:-0-