ԵՐԵՎԱՆ, 26 հունվարի. /Նովոստի-Արմենիա/. Կարելի է խուսափել ընտրակեղծիքներից և ընտրություններն անցկացնել թափանցիկ ու արդար անգամ ներկայիս ոչ կատարյալ ընտրական օրենսդրության դեպքում, հինգշաբթի լրագրողներին հայտարարել է «Ազատ դեմոկրատներ» ընդդիմադիր կուսակցության անդամ, ՀՀ նախկին արտգործնախարար Ալեքսանդր Արզումանյանը:
«Նախորդ ընտրությունների համեմատ՝ այժմ ընտրակեղծիքները կանխելու ավելի շատ հնարավորություն կա: Այսօր մենք ունենք տարբեր քաղաքական ուժեր ներկայացնող դիտորդներից ձևավորված համակարգ, և եթե նրանց աշխատանքը լավ համակարգվի, ապա հնարավոր կլինի խուսափել մի շարք խախտումներից, որոնք սովորաբար տեղի են ունենում ընտրությունների ժամանակ», - ասել է Արզումանյանը:
Խոսելով հարյուրտոկոսանոց համամասնական ընտրահամակարգին անցում կատարելու մասին ընդդիմադիր ուժերի պահանջների մասին՝ Արզումանյանը նշել է, որ դա կապված է նախորդ ընտրությունների «դառը փորձի» հետ:
«Ժառանգություն» և Դաշնակցություն ընդդիմադիր խորհրդարանական խմբակցությունները հունվարի 12-ին շրջանառության մեջ են մտցրել օրենսդրական փոփոխությունների փաթեթ, որոնք նախատեսում են մեծամասնական ընտրահամակարգի դյուրացում և անցում հարյուրտոկոսանոց համամասնական համակարգի:
«Մեր երկրում գործող ընտրական համակարգը կիրառվում է նաև մի շարք այլ երկրներում և քաղաքական ուժերի դժգոհության պատճառ չի դառնում, ինչպես դա տեղի է ունենում մեզ մոտ: Հայաստանի դեպքում ամբողջովին համամասնական համակարգը նպաստում է նրան, որ խորհրդարան կանցնեն ավելի շատ միավորումներ և դաշինքներ, որոնք համախմբված են միևնույն գաղափարախոսության շուրջ, այլ ոչ թե առանձին օլիգարխներ», - ասել է Արզումանյանը:
Նա նաև նշել է, որ երկրի ամենախոշոր ընդդիմադիր ուժերից մեկը՝ ՀԱԿ-ը (որը գլխավորում է ՀՀ առաջին նախագահ Լևոն Տեր-Պետրոսյանը), չի կարող գաղափարախոսական միություն լինել, «քանի որ այնտեղ կան ինչպես սոցիալիստական, այնպես էլ լիբերալ հայացքներ ունեցող անձինք», դա մեկ առաջնորդի շուրջ համախմբված միավորում է», - ասել է նա:
ՀՀ խորհրդարանական ընտրությունները կանցկացվեն մայիսի 6-ին:-0-
