Ընդդիմադիր Հայ ազգային կոնգրեսը Երևանում հոկտեմբերի 15-ին և 19-ին հանրահավաքներ կանցկացնի, երեքշաբթի լրագրողներին ասաց ընդդիմադիր Հայ ազգային կոնգրեսի համակարգող Լևոն Զուրաբյանը:
Նրա խոսքերոսվ՝ հոկտեմբերի 15-ին կայանալիք հանրահավաքի ժամանակ անդրադարձ կարվի հիմանական հարցերին, «որոնք կապված են իշխանությունների ձախողումների հետ, մասնավորապես՝ ճգնաժամը և 2008 թ.-ի մարտի 1-2-ի ողբերգական իրադարձություններից հետո քաղաքական հետևանքները հաղթահարելու անկարողության հետ, երկրում տիրող ծանր սոցիալ-տնտեսական իրավիճակն ու գնաճի մեծացումը՝ կոռուպցիոն լուրջ ռիսկերի ֆոնի ներքո, ինչպես նաև արտաքին քաղաքականության մեջ ձախողումները»:
Ինչ վերաբերում է հոկտեմբերի 19-ին կայանալիք հանրահավաքին, ապա ՀԱԿ-ի համակարգողը նշեց, որ այն նվիրված է Հայաստանում հոկտեմբերի 19-21-ը կայանալիք Եվրոպայի Խորհրդի Հանուն ժողովրդավարության համաժողովի անցկացմանը, որում նախատեսվում է Եվրոպայի Խորհրդի բարձրաստիճան բոլոր անձանց, ԵԽ մարդու իրավունքների պաշտպանության գրասենյակի, ինչպես նաև միջազգային և հասարակական իրավապաշտպան կազմակերպությունների ներկայացուցիչների մասնակցությունը:
«Հայաստանում նման համաժողովի անցկացումը սեփական դիրքորոշումները ներկայացնելու լավ առիթ է, ինչի կապակցությամբ ՀԱԿ-ը ծրագրում է մի քանի միջոցառումներ, այդ թվում նաև՝ հանրահավաք և երթ, որոնք կանցկացվեն հոկտեմբերի 19-ին», - ասաց Զուրաբյանը՝ ընդգծելով, որ մնացած միջոցառումների մասին կհայտարարվի հոկտեմբերի 15-ին:
Նրա խոսքերով՝ հանրահավաքների անցկացման վայրը նույնն է՝ Մատենադարանին հարող տարածքը, քանի որ ՀԱԿ-ը Երևանի քաղաքապատերանից մերժում է ստացել Ազատության հրապարակում միջոցառումների անցկացման կապակցությամբ:
«Մերժումն անօրինական է, քանի որ մեզ, առաջին հերթին, առաջարկվել է հանրահավաքն անցկացնել այլ վայրում, ինչը նախատեսված չէ օրենսդրությամբ, իսկ երկրորդը՝ քանի որ Ազատության հրապարակում այդ ժամանակ որևէ այլ միջոցառման անցկացման մասին պաշտոնապես հայտարարված չէ», - ասաց Զուրաբյանը:
Միաժամանակ նա նշեց, որ եթե իշխանությունները հետագայում ևս շարունակեն մերժել ՀԱԿ-ին Ազատության հրապարակում միջոցառումների անցկացման հարցում, ապա «համբերության բաժակը կլցվի, և ՀԱԿ-ը համաժողովրդական հանրահավաք կանցկացնի Ազատության հրապարակում»:-0-
