Հայ հրուշակագործները պատրաստել են մոտ 4,5 տոննա քաշ ունեցող աշխարհի ամենամեծ շոկոլադե սալիկը
«Grand Candy» հրուշակեղենի հայկական ֆաբրիկան Գինեսի գրքի համաշխարհային ռեկորդ է սահմանել՝ պատրաստելով 4,41 տոննա քաշ ունեցող աշխարհի ամենամեծ շոկոլադե սալիկը:
Ռեկորդը գրանցվել է շաբաթ օրը Գինեսի ռեկորդների գրքի ներկայացուցչի մասնակցությամբ: Շոկոլադե սալիկն ունի 5600 մմ երկարություն, 2750 մմ լայնություն, 250 մմ հաստություն:
«Աշխարհի ամենամեծ շոկոլադե սալիկի պատրաստումը նվիրված է Grand Candy ընկերության 10-ամյակին, որի անվանումը թարգմանաբար նշանակում է «հսկա կոնֆետ», և ընկերության հոբելյանի օրը՝ հոկտեմբերի 16-ին, Հանրապետության հրապարակում կայանալիք համերգի ընթացքում սալիկը կբաժանվի բոլոր ցանկացողներին», - լրագրողներին ասաց Grand Candy ընկերության սեփականատեր, ՀՀ ԱԺ պատգամավոր Կարեն Վարդանյանը:
Նրա խոսքերով՝ ելնելով մեկ հոգու կողմից շոկոլադի օգտագործման միջին ծավալի հաշվարկից՝ մեկ մարդը կկարողանա ուտել այս սալիկը 450 տարվա ընթացքում:
Վարդանյանը տեղեկացրեց, որ սալիկի վրա ընկերությունը մի քանի միլիոն դրամ է ծախսել: 30-40 մարդ է աշխատել սալիկի պատրաստման համար՝ սկսած կոնստրուկտորներից մինչև տեխնոլոգները:
Ռեկորդակիր-սալիկը պատրաստվել է չորս օրվա ընթացքում ստեղծված հատուկ ձևով, այն պարունակում է բնական բաղադրամասեր և ըստ բաղադրատոմսի՝ համապատասխանում է սովորական 70 տոկոսանոց դառը շոկոլադին: Սալիկի պատրաստման համար նախատեսված հումքը ներկրվել է Գանայից (Աֆրիկա):
Գինեսի ռեկորդների գրքի ներկայացուցիչ Էիլսաբեթ Սմիթի խոսքերով՝ վերջին երեք տարվա ընթացքում սա առաջին հայտն է, որը ներկայացվել է այս կատեգորիայում:
Նմանատիպ նախորդ ռեկորդը գրանցվել էր Իտալիայում 2007 թ.-ին, երբ Գինեսի ռեկորդների գրքում գրանցվել էր 3,58 տոննա ունեցող շոկոլադե սալիկը:
«Ես առաջին անգամ են Հայաստանում և շատ տպավորված եմ այս միջոցառումով: Սա ապշեցուցիչ ռեկորդ է, ես առաջին անգամ եմ շոկոլադե սալիկի ռեկորդ գրանցում, և քանի որ շոկոլադ շատ եմ սիրում, ինձ համար սա կրկնակի հաճույք է», - ասաց Սմիթը:
«Grand Candy» ընկերությունն արդեն ամենամեծ պաղպաղակի և ամենամեծ թխվածքաբլիթի արտադրության առաջարկ է ստացել:
«Grand Candy» ՍՊԸ-ն հիմնադրվել է 2000 թ.-ին՝ Երևանի հրուշակեղենի և մակարոնեղենի ֆաբրիկայի հիման վրա, որը գործարկվել է 1993 թ.-ի: Ընկերությունը Հայաստանում հրուշակեղենի արտադրությամբ զբաղվող խոշորագույն ընկերություններից է, ինչպես նաև Անդրկովկասի միակ ձեռնարկությունն է, որը զբաղվում է կակաոյի հատիկների վերամշակմամբ:-0-
