ԵՐԵՎԱՆ, 27 հուլիսի./Նովոստի-Արմենիա/. Ուկրաինայի արտգործնախարար Կոնստանտին Գրիշչենկոն օգոստոսին Հայաստան կայցելի, Երևանի Մամուլի ազգային ակումբում ասուլիսի ժամանակ հայտնեց Հայաստանում Ուկրաինայի արտակարգ և լիազոր դեսպան Ալեքսանդր Բոժկոն։
«Ուկրաինայի արտգործնախարարը Հայաստանի ղեկավարության հետ կքննարկի երկկողմանի համագործակցության արդիական, ինչպես նաև տարածաշրջանային հարցեր։ Նախարարի այցից հետո ակնկալվում է ՀՀ նախագահ Սերժ Սարգսյանի այցն Ուկրաինա»,- ասաց դեսպանը։
Ըստ Բոժկոյի՝ այդ այցերը նոր խթան կլինեն հայ-ուկրաինական հարաբերությունների համար։
«Հանդիպումների արդյունքում մի քանի փաստաթղթեր կստորագրվեն, որոնք կոչված են առավել ամրապնդել հարաբերությունները։ Այդ թվում՝ միգրացիոն հոսքերը կարգավորող պայմանագիրը։ Նման պայմանագիր Ուկրաինան արդեն կնքել է Ռուսաստանի և Եվրամիության հետ։ Հայաստանի հետ այդ պայմանագիրը կնքելուց հետո որոշակի տարածք կձևավորվի, որտեղ այդ հարցում համընդհանուր նորմեր կգործեն»,- ընդգծեց Բոժկոն։
Նա նաև նշեց, որ Հայաստանի և Ուկրաինայի միջև քաղաքական հարաբերությունները դինամիկ զարգանում են, իսկ Ուկրաինայի իշխանության փոփոխությունից հետո համագործակցության նոր հեռանկարներ են բացվել։
«Հայաստանի նախագահի և Վիկտոր Յուշչենկոյի միջև հարաբերությունները նորմալ են, սակայն Սերժ Սարգսյանին և Վիկտոր Յանուկովիչին ջերմ և բարեկամական հարաբերություններ են կապում։ Միայն այս տարվա ընթացքում նրանք ութ անգամ հանդիպել են։ Դա վկայում է այն մասին, որ մեզ մեծ ապագա է սպասում»,- ասաց Բոժկոն։ -0-
