ԵՐԵՎԱՆ, 8 հուլիսի. /Նովոստի-Արմենիա/. Բարաք Օբաման մինչև իր պաշտոնավարման ավարտը կճանաչի Հայոց Ցեղասպանությունը, կարծում է Գլենդեյլի քաղաքապետ Արա Նաջարյանը։
«Եթե ոչ այս տարի, ապա հաջորդ տարի ԱՄՆ նախագահ Բարաք Օբաման կճանաչի Հայոց ցեղասպանությունը»,- հինգշաբթի լրագրողներին ասաց Նաջարյանը։
Քաղաքապետի խոսքերով, հայկական ողջ համայնքը վիրավորվել է նրանից, որ Օբաման չի կատարել իր նախընտրական խոստումը, և «Մեծ եղեռն» է ասել «ցեղասպանության» փոխարեն։
ԱՄՆ նախագահ Բարաք Օբաման Օսմանյան կայսրությունում Հայոց ցեղասպանության զոհերի հիշատակի օրվա կապակցությամբ հայ ժողովրդին հղած ուղերձում դարձյալ չարտաբերեց «Ցեղասպանություն» բառը: Փոխարենը նախագահի շուրթերից հնչեցին «Մեծ Եղեռն» բառերը, որոնք հասկանալի են աշխարհի ցանկացած կետում գտնվող յուրաքանչյուր հայի. հենց այդպես են Հայաստանում անվանում 1915-1923թթ.-ի Ցեղասպանությունը։
«Հայերն օժանդակել են Օբամային ընտրությունների ժամանակ, բայց այժմ վիրավորված են»,- ասաց նա։
Նաջարյանը նշեց, որ Օբամայի կողմից նախընտրական խոստումների չկատարման պատճառը թուրքական լոբբին է եղել, ինչպես նաև Իսրայելի գործունեությունը, սակայն իսրայելական ՌՕՈՒ կողմից «Ազատության նավատորմի» գրավումից հետո Իսրայելի և Թուրքիայի միջև հարաբերությունների սրման պատճառով իրավիճակը փոխվել է, և հույս կա, որ Իսրայելը կճանաչի Հայոց ցեղասպանությունը։
«Մենք պետք է շարունակենք աշխատանքը Իսրայելում Ցեղասպանության ճանաչման վերաբերյալ բանաձևի անցկացման ուղղությամբ, և հույս ունեմ, որ Իսրայելը կընդունի բանաձևը՝ դրանով իսկ դաս տալով Թուրքիային»։
Նաջարյանը նշեց, որ Հայաստանը պետք է լուծի իր խնդիրները Թուրքիայի հետ, բայց Հայոց ցեղասպանությունը չպետք է մոռացության տրվի։ «Հայոց ցեղասպանությունը և ղարաբաղյան խնդիրը սփյուռքի համար թիվ մեկ թեմաներն են»,- ասաց նա։
Հայոց մեծ եղեռնը 20-րդ դարի առաջին ցեղասպանությունն է, որը կազմակերպվել և ծրագրավորված իրագործվել է երիտթուրքական կառավարության կողմից, ինչի հետևանքով Օսմանյան կայսրության կազմի մեջ մտնող Արևմտյան Հայաստանում, սրի է քաշվել ավելի քան 1,5 մլն. հայ։
Հայոց ցեղասպանության փաստը ճանաչել են բազմաթիվ երկրներ, մասնավորապես, Ուրուգվայը, Լիտվան, Ռուսաստանը, Ֆրանսիան, Իտալիայի խորհրդարանի ստորին պալատը, ԱՄՆ-ի մեծ թվով նահանգներ, ինչպես նաև Հունաստանի, Կիպրոսի, Արգենտինայի, Բելգիայի, Ուելսի խորհրդարանները, Շվեյցարիայի ազգային խորhուրդը, Կանադայի խորհրդարանի համայնքների պալատը և Լեհաստանի սեյմը։ -0-
