ՌԴ ՆԳՆ-ն և Հայաստանի ոստիկանությունը կշարունակեն համագործակցությունը հանցագործների և անհայտ կորած անձանց համատեղ հետախուզման ոլորտում: Այս թեման ներառվել է երկու երկրների միավորված կոլեգիայի նիստի օրակարգում, որը տեղի է ունեցել շաբաթ օրը Երևանում, հաղորդում է «ՌԻԱ Նովոստին»:
Ինչպես լրագրողներին տեղեկացրել է ՌԴ ներքին գործերի նախարար Ռաշիդ Նուրգալիևը, տարեցտարի համատեղ ջանքերի շնորհիվ հայտնաբերվում է հետախուզման մեջ գտնվող ավելի շատ հանցագործ: Միայն նախորդ տարի Ռուսաստանի միլիցիոներները ձերբակալել են հայկական կողմից հետախուզման մեջ գտնվող 257 հանցագործի: ՀՀ ոստիկանությունն իր հերթին բացահատել է ՌԴ-ի կողմից միջպետական հետախուզման մեջ գտնվող 158 անձի:
«Այս ոլորտում շարունակում է լուրջ խնդիր մնալ Միջպետական տեղեկատվական բանկի ձևավորումը», - նշել է Նուրգալիևը: «Այժմ բանկում ներառված է տեղեկատվություն տարբեր հանցագործությունների կատարման համար ՌԴ ներքին գործերի մարմինների կողմից հետախուզման մեջ գտնվող 61 հազար անձի մասին: Հայաստանի կողմից միջպետական հետախուզում է հայտարարված 12 հազար անձի նկատմամբ, որոնք թաքնվում են արդարադատությունից»:
Բացի տեղեկատվության փոխանակումից և հարցումների մշակումից ՌԴ ՆԳՆ-ն և ՀՀ ոստիկանությունը համատեղ օպերատիվ-հետախուզական խմբեր են ստեղծում, կազմակերպում են աշխատակիցների գործուղումներ, անցկացնում են համատեղ միջոցառումներ:
Միաժամանակ Նուրգալիևը նշեց հանցագործների հետախուզման հարցում ճանապարհային միլիցիայի կատարած մեծ ներդրումը:
«Նախորդ տարի ՌԴ ճանապարհային միլիցիան բացահայտել է ԱՊՀ մասնակից-պետությունների իրավապահ մարմինների կողմից հետախուզման մեջ գտնվող 659 անձի», - տեղեկացրել է նա: «2010 թ.-ի առաջին երեք ամսվա ընթացքում «Ռոզիսկ-Մագիստրալ» ծրագրատեխնիկական համալիրի օգնությամբ արդեն հայտնաբերվել և ձերբակալվել է 149 անձ, որոնցից 28-ը հետախուզվում են ՀՀ ոստիկանության կողմից»:
Ինչպես ճշտեց նախարարը, մի շարք կասկածյալներ ձերբակալվել են Սարատով-Մոսկվա և Չիտա-Մոսկվայի երկաթուղային գնացքներում:
«Այս ուղղությամբ տարվող աշխատանքը թափ է հավաքում», - փաստել է ՌԴ ՆԳ նախարարը:
ՀՀ ոստիկանապետ Ալիկ Սարգսյանն իր հերթին կարևորել է Ռուսաստանի նախարարության հետ համագործակցությունը:
«Ռուսաստանը մեր հիմնական, ռազմավարական գործընկերն է, և շատ կարևոր է, որ մեր համագործակցությունը դինամիկ կերպով զարգանում է գործնական հարթակում», - ընդգծել է նա:
ՌԴ ՆԳՆ-ի և ՀՀ ոստիկանության միավորված կոլեգիայի հաջորդ` 12-րդ նիստը տեղի կունենա 2011 թ.-ի հունիսին Աստրախանի շրջանում:-0-
