Հայաստանը մեծ նշանակություն է տալիս ՀԱՊԿ կայացմանը. Սարգսյան

Հայաստանը մեծ նշանակություն է տալիս ՀԱՊԿ ձևավորմանն ու կայացմանը, երկուշաբթի ասաց Հայաստանի նախագահ Սերժ Սարգսյանը ՀԱՊԿ Խորհրդարանական Վեհաժողովի խորհրդի արտագնա նիստին մասնակցելու նպատակով Երևան ժամանած Կազմակերպության անդամ երկրների խորհրդարանական պատվիրակությունների ղեկավարների հետ հանդիպման ընթացքում։

Երկուշաբթի Հայաստանում առաջին անգամ տեղի  ունեցավ ՀԱՊԿ ԽՎ արտագնա նիստը, որի ընթացքում քննարկվել է 15 հարց:

«Նշելով Հայաստանում ՀԱՊԿ ԽՎ Խորհրդի արտագնա նիստի անցկացման կարևորությունը՝ Սարգսյանը նշեց, որ Երևանը մեծ նշանակություն է տալիս ՀԱՊԿ ձևավորմանն ու կայացմանը, Կազմակերպության շրջանակներում տեղի ունեցող ինտեգրացիոն գործընթացներին»,- «Նովոստի-Արմենիա» գործակալությանը հայտնեցին նախագահի մամուլի ծառայությունից։

Երկրի ղեկավարի խոսքերով՝ պատահական չէ, որ ՀԱՊԿ շրջանակներում ստորագրած 31 պայմանագրից 30-ն արդեն հավանության են արժանացել Հայաստանի Ազգային Ժողովի կողմից։

«Նշելով, որ նույնիսկ ամենախոշոր երկրները միշտ չէ, որ ի վիճակի են միայնակ դիմակայել ահագնացող մարտահրավերներին` Սերժ Սարգսյանն  ասաց, որ  այնպիսի երկրների համար, ինչպիսին Հայաստանն է, շատ կարևոր են Կազմակերպության շրջանակում տեղի ունեցող ինտեգրացիոն գործընթացները»,- նշեցին մամուլի ծառայությունից:

Հայաստանի նախագահը վստահություն հայտնեց, որ երևանյան նիստի ադյունքները կնպաստեն Կազմակերպության ամրապնդմանը և անդամ-երկրների փոխգործակցության արդյունավետության հետագա բարձրացմանը։

Իր հերթին ՀԱՊԿ Խորհրդարանական վեհաժողովի նախագահ, ՌԴ Պետդումայի նախագահ Բորիս Գռիզլովը նշել է, որ երևանյան հավաքը ՀԱՊԿ Խորհրդարանական վեհաժողովի առաջին արտագնա նիստն է:

Նիստի մասնակից պատվիրակությունների ղեկավարները շնորհակալություն են հայտնել ջերմ ընդունելության համար և նշել, որ կառուցողական և շահագրգիռ քննարկում է ծավալվել օրակարգային հարցերի վերաբերյալ:

Նրանք վստահություն են հայտնել, որ երևանյան արտագնա նիստը  նոր ազդակ կհաղորդի ՀԱՊԿ խորհրդարանական բաղադրիչին: -0-