Հայաստանը կարևորում է ԵԱՀԿ-ի դերակատարությունը տարածաշրջանում կայունության և անվտանգության հաստատման գործում, ասել է Հայաստանի նախագահ Սերժ Սարգսյանը ԵԱՀԿ մամուլի ազատության հարցերով ներկայացուցիչ Դունյա Միյատովիչի հետ հանդիպման ընթացքում, երեքշաբթի «Նովոստի-Արմենիա» գործակալությանը հայտնեցին նախագահի մամուլի ծառայությունից։
Սերժ Սարգսյանը նաև ընդգծել է ԵԱՀԿ-ի տարբեր կառույցների գործունեության կարևորությունը Հայաստանում ժողովրդավարության հետագա ամրապնդման, օրենքի գերակայության հաստատման, ընտրական գործընթացների կատարելագործման և մարդու հիմնարար ազատությունների պաշտպանության գործում:
Դունյա Միյատովիչը նշել է, որ առաջին անգամ է այցելում Հայաստան և տպավորված է իր աշխատանքային խմբին այստեղ ցուցաբերված լավ ընդունելությամբ և համագործակցության պատրաստակամությամբ:
ԵԱՀԿ ներկայացուցիչը ողջունել է ՀՀ կառավարության` քաղաքացիական, քրեական և քրեական դատավարության օրենսգրքերում վիրավորանքի և զրպարտության ապաքրեականացմանն ուղղված քայլերը` այն համարելով մամուլի ազատությունը խթանող կարևոր հանգամանք, ինչը, նրա խոսքով, բազմաթիվ արևմտաեվրոպական երկրներ ևս նոր են նախաձեռնում:
Զրուցակիցներն անդրադարձել են նաև հեռուստառադիոծրագրերը թվային հեռարձակման ցանցով հեռարձակելու գործընթացին:
Միյատովիչն այն գնահատել է որպես ապագային ուղղված կարևոր քայլ և պատրաստակամություն է հայտնել փորձագիտական աջակցություն ապահովելու «Հեռուստատեսության և ռադիոյի մասին» ՀՀ օրենքում համապատասխան փոփոխություններ կատարելու գործընթացում:
Հայաստանի Ազգային Ժողովի պատգամավորները Երեքշաբթի կայացած նիստում առաջին ընթերցմամբ քննարկել են «Հեռուստատեսության և ռադիոյի մասին» ՀՀ օրենքում լրացումները, որոնք ենթադրում են հեռուստատեսության և ռադիոյի անցումը թվային հեռարձակման 2013 թվականին։ -0-
