ՌԴ նախագահ Դմիտրի Մեդվեդևի այցը Թուրքիա, որն ավարտվեց նախօրեին, չի հանգեցնի հայ-թուրքական հարաբերությունների ակտիվացման կամ ղարաբաղյան հարցի կարգավորման. ասաց թուրքագետ Ռուբեն Մելքոնյանը։
«Մեդվեդևի այցը Թուրքիա անհրաժեշտ է դիտարկել միայն ռուս-թուրքական հարաբերությունների համատեքստում, քան տարածաշրջանային կամ աշխարհաքաղաքական համատեքստի լայն շրջանակում, ինչի մասին վկայում է ինչպես բանակցությունների գործընթացը, այնպես էլ ստորագրած փաստաթղթերը»,- հինգշաբթի ասաց Մելքոնյանը «Նովոստի» միջազգային մամուլի կենտրոնում տեղի ունեցած մամուլի ասուլիսում։
Ինչ վերաբերում է Ղարաբաղի վերաբերյալ արված հայտարարություններին, ապա ինչպես կարծում է փորձագետը, Ռուսաստանը, լինելով ղարաբաղյան կարգավորման ԵԱՀԿ Մինսկի խմբի համանախագահ, ըստ կարգավիճակի պետք է դիրքորոշում արտահայտի, և Մեդվեդևի հայտարարությունը հայ-թուրքական հարբերությունների կարգավորման և ղարաբաղյան հարցի խաղաղ լուծմանը կողմ հանդես եկող Ռուսաստանի պաշտոնական դիրքորոշման հաստատումն է։
Նա նշեց, որ հանդիպման ձևաչափը թույլ էր տալիս չանդրադառնալ այս թեմային այցի ընթացքում, և հնչեցրած հարցն ավելի շատ տեղավորվում է թուրքական քաղաքականության համատեքստում՝ միջազգային ցանկացած հանդիպմանն անդրադառնալ ղարաբաղյան կարգավորման հարցին՝ դրանով իսկ տպավորթյուն ստեղծելով, որ այդ հարցն Անկարայի քաղաքական առաջնահերթությունների թվում է։
«Սա կապված է այն հեռանկարի հետ, որը սպասում է Թուրքիային, մասնավորապես, առաջիկա խորհրդարանական ընտրությունների հետ կապված, որտեղ հայ-թուրքական արձանագրությունները և դրանց շուրջ զարգացումներն ինչպես իշխանությունների, այնպես էլ ընդդիմության նախընտրական քարոզարշավի կարևոր ատրիբուտ կդառնան»,- ասաց Մելքոնյանը։
Ինչպես նշեց թուրքագետը, տարբեր առիթներով բարձրացնելով հայ-թուրքական հարաբերություններին և ղարաբաղյան հակամարտությանը վերաբերող հարցը՝ թուրքական իշխանությունները հիմք են ստեղծում հետագա քարոզչությունն իրենց համար անհրաժեշտ հունով տանելու համար։
Ռուսաստանի նախագահ Դմիտրի Մեդվեդևն իր թուրք գործընկերոջ հետ բանակցությունների արդյունքներով անցկացրած մամուլի ասուլիսում հույս է հայտնել, որ ի վերջո և Թուրքիան, և Հայաստանը կկարողանան հասնել անհրաժեշտ լուծումների և վերականգնել հարաբերությունները ողջ ծավալով։ Մեդվեդևը նշել է նաև, որ Մոսկվան և Անկարան մտադիր են օժանդակել կովկասյան տարածաշրջանի կայունության ամրապնդմանը և, մասնավորապես, Լեռնային Ղարաբաղի հակամարտության հանգուցալուծմանը։ -0-
