Գազամատակարարումը վերականգնվել է. ՀայՌուսգազարդ

ԵՐԵՎԱՆ, 11 մայիսի. /Նովոստի-Արմենիա/. Մայիսի 11-ին ժամը 04:00 վերականգնվել է Հայաստան բնական գազի մատակարարումը, երեքշաբթի «Նովոստի-Արմենիա» գործակալությանը հայտնեցին «ՀայՌուսգազարդ» ՓԲԸ-ի մամուլի ծառայությունից:

Ռուսական գազի մատակարարումը Հայաստանը ժամանակավորապես դադարեցվել էր ապրիլի 28-ին՝ Հյուսիսային Կովկասի բարձր լեռնային Գուդաուրի-Կոբի շրջանում սողանքների հետևանքով վնասված մայրուղային գազատարի պատճառով:

Գազամատակարարումը ձգձգվում էր Վրաստանում գազատարի վնասվածքների պատճառով։ Ինչպես նախօրեին հայտնել էր Նավթի և գազի վրացական կորպորացիայի (Georgian Oil & Gas Corporacion) հասարակայնության հետ կապերի բաժնի ղեկավար Թամար Շոշիաշվիլին, մայիսի 4-ին Ժինվալ ՀԷԿ-ի մերձակայքում ժայռից պոկվել էր 20-տոննա քաշով մեծաբեկոր, իսկ մայիսի 6-ին սողանք էր արձանագրվել նաև Դուշետիի շրջանի չորս գյուղում։

Ապրիլի 28-ի երեկոյից մայիսի 10-ն ընկած ժամանակահատվածում, երբ դեպի Հայաստան գազամատակարարումն ընդհատվեց, Հայաստանում գազի ներքին պահանջարկը, որը կազմում է օրական մոտ 2,5 մլն խորանարդ մետր, առանց սահմանափակումների ապահովվել է պահեստավորված գազի հաշվին։

«ՀայՌուսգազարդ» ՓԲԸ-ն Հայաստանի ներքին շուկայում ռուսական բնական գազի մատակարարման և տեղաբաշխման մենաշնորհային իրավունք ունի։ Գազը մուտք է գործում Հայաստան Վրաստանի տարածքով:

Ընկերությունը ստեղծվել է 1997 թ.-ին, «Գազպրոմ» ԲԲԸ-ի մասնաբաժինն ընկերության կանոնադրական կապիտալում կազմում է 80 տոկոս, Հայաստանի կառավարության բաժինը՝ 20 տոկոս:

Աբովյանի գազի պահեստարան-կայանը Հայաստանի գազատրանսպորտային համակարգի գլխավոր տարրերից է, որն ապահովում է հանրապետության էներգետիկ անվտանգությունը:

Աբովյանի գազի ստորգետնյա պահեստարան-կայանը գազի արդյունաբերական օգտագործման մեջ կարգավորում է սեզոնային և պիկային անհամաչափությունները:

2010 թ.-ի մարտի 1-ի դրությամբ Աբովյանի գազի ստորգետնյա պահեստարան-կայանում պաշարված բնական գազի փաստացի ծավալը կազմել է 118 միլիոն խորանարդ մետր: Գազի մատակարարման օբյեկտների խափանման դեպքում այս կայանը, կախված տարվա ժամանակից, ի վիճակ է գազ մատակարարել 1-1,5 ամսվա ընթացքում:-0-