Հայաստանը չի բացառում Թուրքիայի կողմից հայ-թուրքական արձանագրությունների վավերացման հնարավորությունը. ՀՀԿ

ԵՐԵՎԱՆ, 22 մարտի. /Նովոստի-Արմենիա/. Թուրքիան հնարավոր է՝ վավերացնի հայ-թուրքական արձանագրությունները, կարծում է ՀՀ ԱԺ գիտության, կրթության, մշակույթի, երիտասարդության և սպորտի հարցերով մշտական հանձնաժողովի նախագահ, Հայաստանի Հանրապետական կուսակցության խորհրդարանական խմբակցության անդամ Արտակ Դավթյանը:

«Դրա հավանականությունը ես ավելի բարձր եմ գնահատում, քան հակառակ գործընթացը», - ասաց նա երկուշաթի Մամուլի ազգային ակումբում հրավիրված ասուլիսի ժամանակ:

Միաժամանակ Դավթյանն ընդգծեց, որ ՀՀ նախագահ Սերժ Սարգսյանն արդեն հայտարարել և երաշխավորել է, որ Հայաստանը կվավերացնի արձանագրությունները միայն այն ժամանակ, երբ դրանք կվավերացնի Թուրքիայի խորհրդարանը:

Հայաստանի և Թուրքիայի հարաբերությունները բավականին լարված էին մինչև վերջերս, երբ երկու երկրների արտգործնախարարները հոկտեմբերի 10-ին Ցյուրիխի համալսարանում ստորագրեցին «Դիվանագիտական հարաբերությունների հաստատման մասին արձանագրությունը» և «Երկկողմ հարաբերությունների զարգացման մասին արձանագրությունը»: Փաստաթղթերը ստորագրումից հետո պետք է հավանության արժանանան երկու երկրների խորհրդարանների կողմից:

ՀՀ նախագահ Սերժ Սարգսյանը, հետևելով փետրվարի 10-ին Միջազգային հարաբերությունների թագավորական ինստիտուտում ելույթի ժամանակ արված իր հայտարարությանը, հայ-թուրքական արձանագրությունները ներկայացրեց խորհրդարանի վավերացմանը:

Դավթյանը չի կարծում, որ հայ-թուրքական հարաբերությունների կարգավորման գործընթացը ձախողվել է:

«Դա ձախողված գործընթաց չէ, այն շարունակվում է, սակայն հարաբերություններն այնքան բարդ են, որ որոշ խոչընդոտներ և ժամանակավոր ձգձգումներ տեղի են ունեցել և շարունակում են տեղի ունենալ», - ասաց նա:

Այս կապակցությամբ պատգամավորը նշեց, որ ներկա փուլում կոնկրետ քայլեր պետք է ձեռնարկի Թուրքիան:

Նրա կարծիքով, ողջ համաշխարհային հանրությունը սպասում է որոշակի կառուցողական քայլերի Թուրքիայի կողմից, դա է՝ խորհրդարանում երկկողմ արձանագրությունների քննարկումն ու վավերացումը:

Հայաստանի և Թուրքիայի միջև չկան դիվանագիտական հարաբերություններ, իսկ 1993-ից, պաշտոնական Անկարայի նախաձեռնությամբ, փակ է հայ-թուրքական սահմանը։

Երկու երկրների միջև բարդ հարաբերությունները պայմանավորված են մի շարք հանգամանքներով, որոնք կապված են, մասնավորապես, Անկարայի՝ ադրբեջանական դիրքորոշման պաշտպանությամբ ղարաբաղյան հարցում, ինչպես նաև Թուրքիայի սուր արձագանքի հետ 1915 թվականին Օսմանյան կայսրությունում Հայոց ցեղասպանության միջազգային ճանաչման հետ կապված։ --0—