Պատրիարք Կիրիլի բարիգալստյան «Հրաշափառի» արարողությունը մեկնարկել է Մայր Աթոռ Սուրբ Էջմիածնում
Մոսկվայի և Համանայն Ռուսիո Պատրիարք Կիրիլի բարիգալստյան «Հրաշափառի» արարողությունը մեկնարկել է Մայր Աթոռ Սուրբ Էջմիածնում: Մոսկվայի և Համանայն Ռուսիո Պատրիարքին ողջույնի խոսքով դիմել է Ամենայն Հայոց Գարեգին Երկրորդ Կաթողիկոսը:
Բարիգալստյան «Հրաշափառի» արարողության ժամանակ Մայր Աթոռ Սուրբ Էջմիածին կբերվի Հայ Առաքելական եկեղեցու գլխավոր սրբություններից մեկը՝ Սուրբ Գրիգոր Լուսավորչի Շնորհատու աջը:
Այնուհետև Պատրիարք Կիրիլը ծաղկեպսակ կդնի 1826-1828թթ. ռուս-պարսկական պատերազմում զոհված ռուս զինվորների հուշակոթողին, որ գտնվում է Էջմիածնից դեպի Օշական ճանապարհին: Երեկոյան Ռուս ուղղափառ եկեղեցու պատվիրակությունը ներկա կգտնվի «Էջմիածին» Երիտասարդության տանը կայանալիք համերգին:
Հայ Առաքելական եկեղեցու Հովվապետի նստավայրում գտնվող գահադահլիճում՝ ներկայությամբ երկու Հայրապետների, կկատարվի համաձայնագրի կնքում Սերգիև Պասադի և Էջմիածնի միջև որպես քույր քաղաքների։ -0-