Սերգեյ Փարաջանովին նվիրված փառատոն՝ Մեծ Բրիտանիայում

Աշխարհահռչակ ռեժիսոր Սերգեյ Փարաջանովին նվիրված փառատոն կանցկացվի Լոնդոնում և Բրիստոլում փետրվարի 22-ից մայիսի 9-ը, «Նովոստի-Արմենիա» գործակալությանը տեղեկացրեց փառատոնի կազմակերպիչ Լեյլա Ալեքսանդեր-Գարեթը (Layla Alexander-Garrett):

Նրա խոսքերով, սա առաջին խոշոր փառատոնն է՝ նվիրված լեգենդար նկարչին և ռեժիսորին, ում տաղանդը, որը հիմնված է Վրաստանի, Հայաստանի, Ուկրաինայի և Ռուսաստանի մշակութային ավանդույթների վրա, դուրս է եկել կրոնական և քաղաքական սահմաններից:

Փառատոնի նպատակը մի շարք միջոցառումների միջոցով բրիտանական լսարանին Սերգեյ Փարաջանովի կյանքն ու ստեղծագործությունը ներկայացնելն է:

Մասնավորապես, ծրագրվում է անցկացնել Փարաջանովի ֆիլմերի ցուցադրություն, ներկայացնել շարժական կերպարների ինստալյացիա, կինեմատոգրաֆիայի բրիտանական BFI Southbank ինստիտուտում կազմակերպել սիմպոզիումներ և վարպետության դասընթացներ, ինչպես նաև ֆոտոցուցահանդեսներ Ազգային թատրոնում, Լոնդոնում գտնվող Պուշկինի տանը (Pushkin House) ֆիլմեր ցուցադրել և քննարկումներ կազմակերպել, Լոնդոնի Սուրբ Եղիշե հայկական եկեղեցում համերգ անցկացնել, Ժամանակակից արվեստների Arnolfini կենտրոնում կազմակերպել հետահայաց ցուցադրություն և լուսանկարների ցուցահանդես՝ բրիտանական թանգարանում:

Փարաջանովը (1924-1990) կինոյի 20-րդ դարի հռչակավոր վարպետներից է: Նա, լինելով ազգությամբ հայ, ծնվել է Վրաստանում, կինոարվեստ է ուսումնասիրել Մոսկվայում, աշխատել է Ուկրաինայում, Հայաստանում և Վրաստանում:

Փարաջանովը սկսել է կինո նկարահանել 1954թ.-ին և հայտնի է դարձել իր պոետիկ ֆիլմերի շնորհիվ, որոնց թվում են «Նռան գույնը» (1968) և «Աշիկ Քերիբը» (1988): «Մոռացված նախնիների ստվերները» ֆիլմի համար Փարաջանովն արժանացել է Բրիտանական ակադեմիայի մրցանակին:

Տասնհինգ տարի շարունակ (որոնցից հինգն անցկացրել է բանտում) զրկված լինելով ֆիլմեր նկարահանելու հնարավորությունից, որոնցից հինգը նա անցկացրել է բանտում, ռեժիսորը գտել է նկարների, կոլաժների և գրական ստեղծագործության միջոցով սեփական տաղանդի արտահայտման ամենակենդանի միջոցը:

«Փարաջանովն առաջ է անցել իր ժամանակից: Նրա ստեղծագործություններն ունեն տարրեր և ոճական հնարքներ, որոնք ձևավորել են ժամանակակից արվեստը՝ performance-ը, video-art-ը, շարժվող կերպարներն ու խառնված մեդիա-ինստալյացիաները», - նշել է Ալեքսանդր-Գարեթը:

Նա տեղեկացրել է, որ փառատոնի ընթացքում Փարաջանովի ստեղծագործություններն ուսումնասիրող մասնագետները կքննարկեն նկարչի դերն ու ստեղծագործական ժառանգությունը:

«Փարաջանովի ֆիլմերը գերում են իրենց բացառիկ լեզվով և երևակայության պոետիկ ուժով: Փարաջանովը տափակաբանությանը, դաժանությանը, եսասիրությանն ու միակերպությանը հասցված ապտակ է», - նշել է փառատոնի կազմակերպիչը:-0-