Հայաստանի նախագահը կոչ է արել Վերահսկիչ պալատին ավելի ակտիվ համագործակցել իրավապահ մարմինների հետ
Հայաստանի նախագահ Սերժ Սարգսյանը կոչ է արել Վերահսկիչ պալատին 2010 թ.-ին ավելի ակտիվ աշխատել իրավապահ մարմինների հետ:
«Մեր հասարակությունում օբյեկտիվ հարց է ծագում. ինչպե՞ս է ստացվում, որ Վերահսկիչ պալատը հայտնաբերում է խնդիրներ, չարաշահումներ, վատնման փաստեր, սակայն լուրջ, «աղմկոտ» գործեր չեն առաջանում, և բարձրաստիճան պաշտոնյաները չեն դատապարտվում, նրանց դեմ քրեական գործեր չեն հարուցվում: Այս կապակցությամբ ես կարծում եմ, որ 2010 թ.-ին ձեր խնդիրը պետք է լինի ավելի ակտիվ աշխատել իրավապահ մարմինների հետ», - հայտարարեց նախագահը ՎՊ կոլեկտիվի հետ հանդիպման ժամանակ:
ՀՀ նախագահն ավելացրեց, որ իր խոսքերը չեն նշանակում, թե ՎՊ-ն պետք է պետական պաշտոնյաների ցուցակներ կազմի, որոնց պետք է դատել և միանգամից ուղարկի այդ ցուցակները դատախազություն: Նախագահի կարծիքով՝ ՎՊ-ն պետք է ավելի խիստ լինի սեփական հայտարարությունների նկատմամբ և հետևողական՝ արմատախիլ անելու բացահայտված խնդիրները:
Սարգսյանն ընդգծեց, որ ՎՊ-ի գլխավոր խնդիրներից է պետական միջոցների արդյունավետ ծախսման վերահսկողությունը, և եթե աշխարհի ցանկացած երկրում պետական սեփականության նկատմամբ ցանկացած ոտնձգություն համարվում է հանցագործություն, ապա հաշվի առնելով Հայաստանում բազմաթիվ չլուծված հարցերը՝ դա կրկնակի հանցագործություն է, որն ուղղված է նաև ապագա սերունդների դեմ:-0-
