Նվազագույն կենսաթոշակը 2018 թվականին հավասար կլինի նվազագույն սպառողական զամբյուղի չափին. Սոցնախարարություն

Հայաստանում 2018 թվականին նվազագույն կենսաթոշակը հավասար կլինի նվազագույն սպառողական զամբյուղի չափին, ուրբաթ լրագրողներին հայտնեց Հայաստանի սոցիալական ապահովման փոխնախարար Արտեմ Ասատրյանը։

Նրա խոսքերով, այսօր կենսաթոշակային համակարգի բեռնվածության ինդեքսը (աշխատող անձանց և կենսաթոշակառուների թվի հարաբերակցությունը) կենսաթոշակային համակարգի կարևոր ցուցանիշ է, որտեղ ընդունելի է 3։1 հարաբերակցությունը, սակայն Հայաստանում այսօր այդ հարաբերակցությունը կազմում է 1։1։
 
Միաժամանակ, ինչպես նշեց փոխնախարարը, առաջիկա տարիների ժողովրդագրական կանխատեսումները բացասական միտումներ են ցույց տալիս, քանի որ 2011-2012 թվականներին կմոտենա Երկրորդ համաշխարհային պատերազմից հետո ծնված անձանց տարիքը, երբ ժողովրդագրական բում արձանագրվեց, միաժամանակ աշխատանքի շուկա կմտնի 90-ականների սերունդը, երբ արձանագրվեց հարաբերականորեն ցածր ծնելիություն։

«Միտումները ցույց են տալիս, որ կենսաթոշակառուների և աշխատող անձանց հարաբերակցությունն առաջիկայում չի բարելավվի, ինչը լուրջ խնդիր է ֆինանսական համակարգի և կենսաթոշակների ադեկվատ չափի ապահովման տեսանկյունից»,- ասաց Ասատրյանը։

Միաժամանակ նա նշեց, որ Հայաստանում գործում է միջին աշխատավարձի նկատմամբ միջին կենսաթոշակի բավական ցածր ցուցանիշ, որը կազմում է 25 տոկոս, մինչդեռ միջին ցուցանիշը 40 տոկոս է։

«Վերլուծությունը ցույց է տալիս, որ ներկա ժողովրդագրական իրավիճակի պայմաններում տվյալ ցուցանիշը չի կարող բարելավվել և չի պարունակում որևէ դրական միտում, ինչի կապակցությամբ առաջանում է կենսաթոշակային բարեփոխումների իրականացման անհրաժեշտություն»,- ասաց Ասատրյանը։

Փոխնախարարը նշեց նաև, որ կենսաթոշակային ծախսերը պետբյուջեի շրջանակներում կազմում են ՀՆԱ 5,8 տոկոսը, ինչը պետբյուջեի սոցիալական ծախսերի ամենաբարձր ուղղությունն է։

Միաժամանակ նա նշեց, որ ուսումնասիրությունների համաձայն, նվազագույն սպառողական զամբյուղին հավասար կենսաթոշակի վճարման համար անհրաժեշտ է մեծացնել կենսաթոշակային ծախսերն առնվազն երկու անգամ։

«Կենսաթոշակային բարեփոխումները թույլ կտան աստիճանաբար բարձրացնել նվազագույն բազային կենսաթոշակի չափը՝ հասցնելով այն նվազագույն սպառողական զամբյուղի չափին։ Դա ենթադրում է, որ Հայաստանում չեն լինի աղքատ կենսաթոշակառուներ»,- ասաց Ասատրյանը։

Փոխնախարարն ավելացրեց, որ հենց դրան են ուղղված կառավարության կողմից անցկացվող կենսաթոշակային բարեփոխումները, որոնց հաշվին 2011 թվականից Հայաստանում կներդրվի կենսաթոշակային եռաստիճան համակարգ։

«Նոր համակարգին համապատասխան նախատեսվում է 2012 թվականին ապահովել միջին բազային կենսաթոշակի համապատասխանեցումը նվազագույն սպառողական զամբյուղի ցուցանիշին, իսկ 2018 թվականին կենսաթոշակի նվազագույն չափը հասցնել մինչև նվազագույն սպառողական զամբյուղի 100 տոկոսին»։

«Դրանից հետո նվազագույն կենսաթոշակը կապահովի բոլոր կենսաթոշակառուներին նվազագույն սպառողական զամբյուղի չափով»,- ասաց Ասատրյանը։ -0-