ԵՐԵՎԱՆ, 3 դեկտեմբերի. /Նովոստի-Արմենիա/. Ադրբեջանն առայժմ պատրաստ չէ Ղարաբաղյան հակամարտության ռազմական լուծմանը, կարծում է Ազգային և ռազմավարական հետազոտությունների հայկական կենտրոնի տնօրեն Ռիչարդ Գիրագոսյանը։
«Ռազմական բարեփոխում կատարելու մասին որոշում ընդունելու դեպքում Ադրբեջանին 10-12 տարի պետք կլինի դա անելու համար»,- հայտարարեց նա` նշելով, որ Ադրբեջանի ԶՈՒ ռազմական պատրաստվածությամբ զգալիորեն զիջում են հայկական ուժերին։
Սակայն փորձագետը նշեց, որ անհանգստություն է հարուցում Չինաստանից ռազմական ինքնաթիռներ ձեռք բերելու Ադրբեջանի մտադրությունը, ինչպես նաև ռազմական արբանյակ ունենալու ցանկությունը, ինչը կարող է ապակայունացնել իրավիճակը տարածաշրջանում և խախտել ուժերի ստեղծված հավասարակշռությունը։
Ինչ վերաբերում է Ադրբեջանի նախագահի ու այլ պաշտոնատար անձանց ավելի հաճախ հնչող ռազմատենչ հայտարարություններին Ղարաբաղյան հակամարտությունը ռազմական ճանապարհով լուծելու մասին, ապա Գիրագոսյանի կարծիքով, դա ավելի շուտ Հայաստանի և միջազգային միջնորդների վրա ճնշում գործադրելու միջոց է։
Նա նշեց, որ մշտական սպառնալիքներն ու «շեքսպիրյան» հայտարարությունները ընդամենը վնասում են հենց իրեն Ադրբեջանին՝ իր հանդեպ միջնորդների ու միջազգային հանրության կողմից անվստահության զգացողություն առաջ բերելով։
Ղարաբաղյան հակամարտությունը սկսվել է 1988 թվականին, երբ գերազանցապես հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին: 1991թ. դեկտեմբերի 10-ին Լեռնային Ղարաբաղում հանրաքվե անցկացվեց, որի ժամանակ մասնակիցների 99,89 տոկոսը քվեարկեց Ադրբեջանից լիովին անկախանալու օգտին:
Դրան հետևեցին Ադրբեջանի ձեռնարկած լայնածավալ ռազմական գործողությունները, որոնք հանգեցրին նրան, որ նրանք կորցրեցին վերահսկողությունը ոչ միայն Լեռնային Ղարաբաղի, այլև հարակից յոթ շրջանների նկատմամբ:
1994թ. մայիսի 12-ին զինադադարի վերաբերյալ եռակողմ համաձայնագրի կնքումից հետո հակամարտության գոտում դադարեցին ռազմական գործողությունները, որոնց արդյունքում երկու կողմից էլ եղավ շուրջ 25-30 հազար զոհ և մոտ մեկ միլիոն մարդ ստիպված լքեց բնօրրանը:
Հրադադարի ռեժիմ հաստատելու վերաբերյալ համաձայնագիրը մինչ այսօր ուժի մեջ է: 1992 թվականից ի վեր հակամարտության խաղաղ կարգավորման ուղղությամբ բանակցություններ են տարվում ԵԱՀԿ Մինսկի խմբի շրջանակներում, որի համանախագահներն են ԱՄՆ-ն, Ռուսաստանը և Ֆրանսիան:
