Հայաստանում խոզի գրիպի գրանցված դեպքեր չկան, սակայն դրանց հավանականությունը բացառված չէ. գլխավոր ինֆեկցիոնիստ

Այսօրվա դրությամբ Հայաստանում չկա խոզի գրիպի բացահայտված որևէ դեպք, Հայկական երկրորդ հեռուստաալիքին տված հարցազրույցում ասել է ՀՀ գլխավոր ինֆեկցիոնիստ Արա Ասոյանը:

Միաժամանակ նա չի բացառել հանրապետություն A/H1N1 գրիպի թափանցման վտանգը, ինչպես նաև այն բանի հավանականությունը, որ այդ հիվանդության դեպքերը հանրապետությունում առկա են:

«Բժշկական տեսակետից իրավիճակն անբացատրելի է. Հայաստանի հարևան բոլոր երկրներում գրանցվել են գրիպի բազմաթիվ դեպքեր, այդ թվում նաև՝ մահացու ելքով, իսկ Հայաստանում՝ ոչ», - ասել է նա՝ դժվարանալով ասել, թե որքան երկար կտևի այդ իրավիճակն ու կհաջողվի՞, արդյոք, Հայաստանին խուսափել երկիր այդ վարակի թափանցումից:

Ասոյանը նշել է, որ հանրապետությունում իրականացվում են համապատասխան միջոցառումներ, այդ թվում նաև ստուգվել են ավելի քան հինգ տասնյակ քաղաքացիներ, որոնց մոտ բացահայտվել էին կասկածելի ախտանիշներ, սակայան նրանցից ոչ մեկի մոտ չի հաստատվել խոզի գրիպի կասկածը:

«Խստացվել են ստուգումները սահմանային կետերում, հատկապես Ուկրաինայից ժամանող ուղևորների նկատմամբ: Մենք խստացրել ենք նաև ստուգումները մանկապարտեզներում և դպրոցներում», - ընդգծել է նա:

Այս կապակցության գլխավոր ինֆեկցիոնիստը տեղեկացրել է, որ դպրոցներում և մանկապարտեզներում իրականացվում են շրջայցեր՝ բացակայող երեխաներին և նրանց բացակայության պատճառները բացահայտելու նպատակով:

«Եթե բացակաների շրջանում կան շնչառական վիրուսի ախտանիշներ ունեցող երեխաներ, ապա իրականացվում են համապատասխան միջոցառումներ», - պարզաբանել է նա:

Միաժամանակ Ասոյանն ընդգծել է, որ խոզի գրիպը վտանգավոր է, քանի որ մեծ է հավանականությունը, որ այն կարող է ենթարկվել մուտացիայի՝ վերածվելով ավելի պաթոգեն, մահացու ելք ունեցող հիվանդության, և հենց սա է խոզի գրիպի վտանգը:

Խոսելով բարդությունների մասին՝ նա նշել է, որ առավել հաճախ զարգանում է թոքերի բորբոքում, որը աշխարհում գրանցված մահացու դեպքերի մեծամասնության պատճառն է:

ՀՀ առողջապահության նախարարության տվյալներով, որը հղում է անում Առողջապահության համաշխարհային կազմակերպությանը, աշխարհում համաճարակաբանական իրավիճակը շարունակում է լարված մնալ: Պաշտոնական վիճակագրության համաձայն՝ 2009 թ.-ի հոկտեմբերի կեսերին աշխարհում գրանցվել է A/H1N1 վիրուսով վարակման 414 հազար դեպք, այդ թվում նաև՝ շուրջ 5 հազար դեպք մահացու ելքով:

ՀՀ առողջապահության նախարարությունը հիշեցնում է, որ մարդկանց մոտ H1N1 վիրուսով հարուցված գրիպի հիմնական ախտանշաններն են` բարձր ջերմություն, գլխացավ, մկանային ցավ, հազ, անգինա, ռինիտ, որոշների մոտ նկատվել է նաև փսխում և դիարեա: Հիվանդության գաղտնի շրջանը 7 օր է: Հարուցիչը շրջակա միջավայրի առարկաների վրա պահպանվում է մոտ 2 ժամ:-0-