ԵՐԵՎԱՆ, 12 հոկտեմբերի. /Նովոստի-Արմենիա/. Հայաստանը երբեք Ադրբեջանի հետ չի քննարկել հողերի վերադարձի հարցը, ասաց Հայաստանի նախագահ Սերժ Սարգսյանը Մոսկվա մեկնելուց առաջ:
«Ես Ալիևի հետ քննարկել եմ միայն Ղարաբաղի կարգավիճակի և այն միջանցքի հարցը, որ պետք է միացնի Հայաստանը Լեռնային Ղարաբաղի հետ»,- ասաց նա:
Միաժամանակ Սարգսյանն ավելացրեց, որ եթե Ալիևը դժգոհ է բանակցային գործընթացից, ապա ինքը «չի կարող նրան ոչնչով օգնել»:
Նախագահի խոսքերով՝ ադրբեջանցի նախագահի հայտարարությունում առկա են մի շարք անճշտություններ, մասնավորապես, նա չի ասում, թե «որտեղ և երբ» է քննարկվել այս հարցը:
Ինչպես Ադրբեջանական հեռուստաընկերությանը տված հարցազրույցում հայտնեց Ադրբեջանի նախագահ Ւլհամ Ալիևը, ադրբեջանական կողմի՝ բանակցությունների նկատմամբ հավատարմության հիմնական պատճառն այն է, որ բանակցային գործընթացում, թեև դժվարությամբ, բայց կան առաջխաղացումներ:
«Վերջին 5-6 տարիների ընթացքում համաձայնեցվել են շատ կարևոր հարցեր: Առաջին հերթին՝ հայկական ուժերը պետք է անվերապահորեն դուրս բերվեն Լեռնային Ղարաբաղի շուրջ գտնվող բոլոր հողերից: Կարող եմ ասել, որ դա մեծ առաջընթաց է բանակցային գործընթացում, քանի որ 4-5 տարի առաջ խոսքը գնում էր չորս, իսկ այնուհետև՝ հինգ շրջանների ազատագրման մասին: Սակայն բանակցային գործընթացքում ձեռնարկված քայլերի արդյունքում արդեն այսօր ես կարող եմ ասել, որ դա համաձայնեցվել է»,- ասաց նա:
Ղարաբաղյան հակամարտությունը սկսվել է 1988 թվականին, երբ գերազանցապես հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին: 1991թ. դեկտեմբերի 10-ին Լեռնային Ղարաբաղում հանրաքվե անցկացվեց, որի ժամանակ մասնակիցների 99,89 տոկոսը քվեարկեց Ադրբեջանից լիովին անկախանալու օգտին:
Դրան հետևեցին Ադրբեջանի ձեռնարկած լայնածավալ ռազմական գործողությունները, որոնք հանգեցրին նրան, որ նրանք կորցրեցին վերահսկողությունը ոչ միայն Լեռնային Ղարաբաղի, այլև հարակից յոթ շրջանների նկատմամբ:
1994թ. մայիսի 12-ին զինադադարի վերաբերյալ եռակողմ համաձայնագրի կնքումից հետո հակամարտության գոտում դադարեցին ռազմական գործողությունները, որոնց արդյունքում երկու կողմից էլ եղավ շուրջ 25-30 հազար զոհ և մոտ մեկ միլիոն մարդ ստիպված լքեց բնօրրանը:
Հրադադարի ռեժիմ հաստատելու վերաբերյալ համաձայնագիրը մինչ այսօր ուժի մեջ է: 1992 թվականից ի վեր հակամարտության խաղաղ կարգավորման ուղղությամբ բանակցություներ են տարվում ԵԱՀԿ Մինսկի խմբի շրջանակներում, որի համանախագահներն են ԱՄՆ-ն, Ռուսաստանը և Ֆրանսիան:--0--
