Հայաստանը կարող է վերադարձնել իր պատմական հողերը Թուրքիայի հետ սահմանների բացման շնորհիվ, կարծում է Հայաստանի խորհրդարանի խոսնակի խորհրդական, տնտեսագիտույթան դոկտոր Թաթուլ Մանասերյանը։
«Եթե Հայաստանը տնտեսապես պատրաստված լինի տնտեսական սուր մրցակցությանը Թուրքիայի հետ սահմանի բացման դեպքում, ապա չի բացառվում, որ ոչ թե ռազմական գործողություններով, այլ տնտեսական լծակների միջոցով մենք կկարողանանք հետ վերցնել ներկայումս Թուրքիայի արևելյան մաս կազմող Արևմտյան Հայաստանի մեր հողերը»,- երեքշաբթի մամուլի ասուլիսում հայտարարեց Մանասերյանը։
Օգոստոսի 31-ին Թուրքիայի և Հայաստանի արտգործանախարարությունները, ինչպես նաև Շվեյցարիայի արտաքին գործերի դեպարտամենտը հայտարարեցին, որ Հայաստանի հետ բանակցություններում, որոնք ընթանում են Շվեյցարիայի միջնորդությամբ, պայմանավորություն է ձեռք բերվել «քաղաքական խորհրդատվություններ» սկսել բանակցությունների ընթացքում շվեյցարական միջնորդությամբ նախնական ստորագրած երկու արձանագրությունների` «Երկու երկրների միջև դիվանագիտական հարաբերությունների հաստատման մասին արձանագրության» և «Երկկողմ հարաբերությունների զարգացման մասին արձանագրության» շուրջ: Քաղաքական խորհրդակցությունները ծրագրվում է ավարտել վեց շաբաթվա ընթացքում, որից հետո կստորագրվեն երկու արձանագրությունները, որոնք կներկայացվեն երկու երկրների խորհրդարանների հաստատմանը:
Հայ փորձագետի խոսքերով՝ այդ հողերը կարող են վերադարձվել դրանց վրա հայկական կապիտալի ներհոսքով տնտեսական ազատ գոտիների, համատեղ ձեռնարկությունների ստեղծման ճանապարհով։
Մանասերյանն ընդգծեց, որ նկատի ունի հայկական կապիտալը, ոչ թե Հայաստանի կապիտալը։
Միաժամանակ խոսնակի խորհրդականը նշեց, որ Թուրքիայի հետ սահմանների բացումից հետո կարող է առաջ գալ նաև զարգացման բացասական տարբերակը, որի դեպքում անպատրաստ հայկական ընկերությունները չեն դիմանա թուրքական ֆիրմաների հետ մրցակցությանը, ինչը կարող է հանգեցնել հայրենական արդյունաբերական կորստի։
Ինչպես նշեց Մանասերյանը, առաջին հերթին սահմանների բացումից առաջ անհրաժեշտ է պարզաբանել՝ ունե՞ն, արդյոք, հայկական ընկերությունները բավարար ներուժ՝ թուրքական ֆիրմաների հետ մրցակցությանը դիմանալու համար, որոնց մեծամասնությունը գործում է օտարերկրյա կապիտալի մասնակցությամբ, իսկ նրանց արտադրանքն արտահանվում է եվրոպական շուկաներ։
«Մեր քայլերը պետք է հավասարակշռված լինեն, չպետք է հապճեպ լինեն՝ չնայած արդեն առկա միջոցառումների ժամանակացույցին»,- հավելեց Մանասերյանը։
Հայաստանի և Թուրքիայի միջև չկան դիվանագիտական հարաբերություններ, իսկ 1993-ից, պաշտոնական Անկարայի նախաձեռնությամբ, փակ է հայ-թուրքական սահմանը։
Առաջին քայլերը հարաբերություններում արվեցին 2008թ. սեպտեմբերի 6-ին, երբ Թուրքիայի նախագահ Աբդուլա Գյուլն առաջին անգամ ՀՀ նախագահ Սերժ Սարգսյանի հրավերով այցելեց Երևան՝ 2010 թ. աշխարհի առաջնության ընտրական փուլի շրջանակներում երկու երկրների հավաքականների միջև ֆուտբոլային հանդիպումը դիտելու համար։ Այցի ընթացքում երկու պետությունների ղեկավարները քննարկեցին երկկողմ հարաբերությունների հաստատման հնարավորությունները։-0-
