Հնդկաստանում բնակվող հայերը միշտ վայելել և վայելում են Հնդկաստանի իշխանությունների բարեհաճությունը, ասել է Հնդկահայոց Հոգևոր հովիվ և Կալկաթայի Հայոց Մարդասիրական ճեմարանի կառավարիչ` Հոգեշնորհ Տ. Խորեն աբեղա Հովհաննիսյանը Արևմտյան Բենգալիա նահանգի նահանգապետ Գոպալկրիշնա Գանդիի հետ հանդիպման ընթացքում:
Ինչպես «Նովոստի-Արմենիա» գործակալությանը տեղեկացրեցին Հայոց Մարդասիրական ճեմարանից, հանդիպումը տեղի է ունեցել նահանգապետի նստավայրում` Ռաջ Բհավան պալատում:
«Հնդկաստանի Հանրապետությունը աշխարհի ամենամեծ ժողովրդավարական երկրներից է, և ահա Աստծո կամքով և օրհնությամբ այժմ ապրում և հոգևոր ծառայությունս եմ բերում նման հարուստ և բազմերանգ մշակույթ ու լեզուներ ունեցող երկրում: Հնդկահայերը հպարտ են` լինելով նման հյուրընկալ պետության քաղաքացիներ, մշտապես վայելելով կառավարության բարեհաճությունը», - ասել է հոգևոր հովիվը:
Նրա խոսքերով, հնդկահայերը երախտապարտ են, որ պահպանում են իրենց ավանդույթները և ազատություն ունեն աղոթելու ու պաշտելու իրենց Աստծուն, ինչպես նաև դաստիարակելու և կրթություն տալու հայ աշակերտներին Հայոց Մարդասիրական ճեմարանում: «Այս ամենի համար երախտապարտ ու շնորհակալ ենք Հնդկաստանի Հանրապետության հյուրընկալ և ժողովրդավար կառավարությանը», - ասել է հնդկահայերի հոգևոր հովիվը:
Նահանգապետն իր հերթին շնորհակալություն և գնահատանք է հայտնել Հայր Սուրբին այցելության համար՝ իր հիացմունքը արտահայտելով Կալկաթայի 300-ամյա Սուրբ Նազարեթ հայոց եկեղեցու մասին՝ նշելով որ վերջինն ավելի հին է, քան նահանգապետի պալատը:
Նա նաև հպարտությամբ է նշել, որ հայերը Կալկաթայում ունեն 188-ամյա կրթօջախ, որն այսօր էլ կրթում և դաստիարակում է հայ աշակերտներին:-0-
