ԵՐԵՎԱՆ, 10 օգոստոսի. /Նովոստի-Արմենիա/. Հայ գրոսմայստերները ոչ-ոքի-ով են սկսել Ջերմուկում (Տիգրան Պետրոսյանի հուշահամալիր) բացված ՖԻԴԵ-ի շախմատի Գրան-պրիի հինգերորդ մրցաշարը, տեղեկացնում է մրցաշարի պաշտոնական կայքը:
Հարկ է նշել, որ մեկնարկային տուրը բավական խաղաղ էր, յոթ պարտիաներից հինգն ավարտվեցին ոչ-ոքի:
Այսպես, առաջին տուրում սև խաղաքարերով խաղացող Լևոն Արոնյանը և Վլադիմիր Հակոբյանը կիսեցին միավորները, համապատասխանաբար, Վասիլի Իվանչուկի (Ուկրաինա) և Եվգենի Ալեքսեևի (Ռուսաստան) հետ:
Նման արդյունք գրանցվեց նաև Գատա Կամսկի (ԱՄՆ) – Էտյեն Բակրո (Ֆրանսիա) խաղերում՝ 0,5:0,5, Ռուստամ Կասիմժանով (Ուզբեկստան) – Սերգեյ Կարյակին (Ուկրաինա)՝ 0,5:0,5, Բորիս Գելֆանդ (Իսրայել) – Պավել Էլյանով (Ուկրաինա)՝ 0,5:0,5:
Հաղթանակ տարան միայն սպիտակ խաղաքարերով Դմիտրի Յակովենկոյին (Ռուսաստան) պարտության մատնած Իվան Չեպարինովը (Բուլղարիա) և Պետեր Լեկոն (Հունգարիա), ով կարողացավ սևերով հաղթանակ տանել Էռնեստո Ինարկիևի (Ռուսաստան) նկատմամբ:
Երկրորդ տուրում Արոնյանը սպիտակներով կխաղա Եվգենի Ալեսքեևի հետ, իսկ Հակոբյանը՝ Իվան Չեպարինովի հետ:
Մրցաշարը նվիրված է 2009 թ.-ին նշվող աշխարհի իններորդ չեմպիոն Տիգրան Պետրոսյանի 80-ամյակին, մրցաշարի մասնակիցները հարգել են մեծանուն շախմատիստի հիշատակը:
Ջերմուկում անցկացվող 19-րդ կատեգորիայի մրցաշարին մասնակցում են գրոսմայստերներ Լևոն Արոնյանը, Դմիտրի Յակովենկոն (Ռուսաստան), Պետեր Լեկոն (Հունգարիա), Բորիս Գելֆանդը (Իսրայել), Էտյեն Բակրոն (Ֆրանսիա), Սերգեյ Կարյակինը (Ուկրաինա), Գատա Կասմկին (ԱՄՆ), Պավել Էլյանովը (Ուկրաինա), Եվգենի Ալեքսեևը (Ռուսաստան), Վլադիմիր Հակոբյանը (Հայաստան), Վասիլի Իվանչուկը (Ուկրաինա), Իվան Չեպարինովը (Բուլղարիա), Էռնեստո Ինարկիևը (Ռուսաստան), Ռուստամ Կասիմջանովը (Ուզբեկստան):--0--
