Ադրբեջանը մոռանում է, որ հենց հայկական կողմն է ստիպել իրեն հաշտության գնալ 1994 թ.-ին. ՀՅԴ

ԵՐԵՎԱՆ, 16 հուլիսի. /Նովոստի-Արմենիա/. Ադրբեջանը մոռանում է, որ հենց հայկական կողմն է ստիպել իրեն հաշտության գնալ 1994 թ.-ին Ղարաբաղյան հակամարտության հարցում, հինգշաբթի «Հայաստանի և Ադրբեջանի նախագահների հանդիպումը Մոսկվայում: Հնարավո՞ր է, արդյոք, առաջընթաց բանակցություններում» թեմայով Երևան-Մոսկվա տեսակամուրջի ընթացքում ասաց ՀՅԴ խորհրդարանական խմբակցության ղեկավար Վահան Հովհաննիսյանը:

«Դուք մոռացել եք, որ մենք ստիպեցինք Ադրբեջանին հաշտության գնալ 1994 թ.-ին: Հաշտությունը կնքվել է Ադրբեջանի խնդրանքով, մեզ այն պետք չէր: Մենք հաղթել էինք՝ ետ մղելով Ադրբեջանի ագրեսիան»,- ասաց Հովհաննիսյանը՝ պատասխանելով ադրբեջանցի լրագրողի հարցին, թե. «հնարավո՞ր է, արդյոք, ՀՀ-ին ու ԼՂՀ-ին խաղաղություն պարտադրել երրորդ ուժերի օգնությամբ»:

Հովհաննիսյանի կարծիքով՝ ադրբեջանցի լրագրողի հենց հարցը վկայում է այն մասին, որ Ադրբեջանում հասկանում են, որ իրենց սեփական զինված ուժերով հայերին չեն կարող կոտրել, և Բաքվում փորձում են դա անել ուրիշների միջոցով:

Ղարաբաղյան հակամարտությունը սկիզբ է առել 1988 թ.-ին, երբ հիմնականում հայերով բնակեցված Լեռնային Ղարաբաղը հայտարարեց Ադրբեջանի կազմից  դուրս գալու մասին։

1991 թ. դեկտեմբերի 10-ին, Խորհրդային Միության փլուզումից մի քանի օր առաջ, Լեռնային Ղարաբաղում տեղի ունեցավ հանրաքվե, որի ժամանակ բնակչության ճնշող մեծամասնությունը՝ 99,89 տոկոսը Ադրբեջանից ամբողջովին անկախանալու կողմ քվեարկեց։

Դրանից հետո սկսվեցին լայնամասշտաբ ռազմական գործողություններ, որոնց հետևանքով Ադրբեջանը կորցրեց վերահսկողությունը Լեռնային Ղարաբաղի և նրան հարակից յոթ շրջանների նկատմամբ։

1994 թ.-ի մայիսի 12-ին՝ զինադադարի մասին համաձայնագրի ուժի մեջ մտնելուց հետո հակամարտության գոտում դադարեցին ռազմական գործողությունները։ Պատերազմի  հետևանքով երկու կողմից զոհվեց մոտավորապես 25-30 հազ մարդ և մոտ  մեկ միլիոնը ստիպված եղավ լքել  բնակավայրերը։

Զինադադարի ռեժիմի մասին համաձայնությունը պահպանվում է մինչ այժմ։

1992 թ.-ից մինչ օրս ընթանում են բանակցություններ հակամարտության խաղաղ կարգավորման ուղղությամբ ԵԱՀԿ Մինսկի խմբի շրջանակներում, որի համանախագահներն են ԱՄՆ-ն, Ռուսաստանը և Ֆրանսիան։-0-