ԵՐԵՎԱՆ, 10 հուլիսի. /Նովոստի-Արմենիա/. Այս տարվա առաջին կիսամյակում ՀՀ Մարդու իրավունքների պաշտպան Արմեն Հարությունյանի գրասենյակը 65 բողոք ավելի է ստացել, քան 2008 թ.-ի նույն ժամանակահատվածում։
«Եթե 2008 թ.-ի առաջին վեց ամսվա ընթացքում Մարդու իրավունքների պաշտպանի գրասենյակ ստացվել է 1768 դիմում-բողոք, ապա այս տարվա նույն ժամանակահատվածում մենք ստացել ենք 1833 բողոք», - ուրբաթ մամուլի ասուլիսի ժամանակ տեղեկացրեց Մարդու իրավունքների պաշտպանը։
Հարությունյանի խոսքերով՝ հասարակության խոցելի խմբերից ստացված բողոքների թիվն ավելացել է 27 տոկոսով։
Մարդու իրավունքների պաշտպանը հատկապես նշեց, որ այս տարի, ինչպես և նախորդ տարի, ամենաշատ բողոքներ ստացվել են ՀՀ ոստիկանության աշխատանքի վերաբերյալ։
«Ստացված բողոքների քանակությամբ երկրորդ տեղում է ՀՀ կրթության և գիտության նախարարությունը՝ 200 բողոք, որոնք հիմնականում կապված են Միասնական պետական քննությունների ընթացքում տեղի ունեցած խախտումների հետ», - նշել է Հարությունյանը։
Նրա խոսքերով՝ շատ բողոքներ է ստացվում նաև Երևանի քաղաքապետարանի, դատարանների և ՀՀ աշխատանքի և սոցիալական հարցերի նախարարության հասցեին։-0-
