Վրաստանում բնակչությանը էթնիկական սկզբունքով չեն տարբերակում, հինգշաբթի ԵՊՀ դասախոսների և ուսանողների հետ հանդիպման ժամանակ հայտարարեց Վրաստանի նախագահ Միխայիլ Սահակաշվիլին։
«Մեր հստակ քաղաքականությունն ու գաղափարախոսությունն այն է, որ Վրաստանը հավասարապես պատկանում է բոլոր էթնիկ խմբերին։ Ոչ մի էթնիկ խումբ առավելություններ չունի։ Որևէ մեկին էթնիկ սկզբունքով առանձնացնելը մեզ համար ինքնասպանություն է»,- ասաց Սահակաշվիլին։
Նա հավելեց, որ ինքը Վրաստանը էթնիկ վրացիների, հայերի, ադրբեջանցիների կամ օսերի չի բաժանում։ Նախագահի խոսքերով՝ Վրաստանի մշակույթը բազմաէթնիկ է, և դա ոչ թե նրա թուլությունն է, այլ՝ ուժը։
Այս առնչությամբ նա ընդգծեց, որ հայերի ներկայությունը Վրաստանում երկրի մշակույթի ու մտածելակերպի կարևոր մասն է։
Մի շարք հայկական հասարակական կազմակերպություններ ու քաղաքական գործիչներ մեղադրում են Վրաստանի իշխանություններին Վրաստանի հայ բնակչության, հատկապես Ջավախքի հայերի իրավունքները ոտնահարելու մեջ։
Ջավախքը գտնվում է Վրաստանի, Հայաստանի և Թուրքիայի սահմանագծին։ Բնակչության ճնշող մեծամասնությունը հայեր են (տարբեր տվյալներով 91-97%)։
Հունիսի 24-25-ին երկօրյա պաշտոնական այցով Հայաստանում էր Վրաստանի նախագահ Միխայիլ Սահակաշվիլին և նրա տիկին Սանդրա Ռուլովսը: --0--
