Երևանում ավարտվել է հաշմանդամների շրջանում անցկացվող մարզական փառատոնը

Երևանում չորեքշաբթի տեղի է ունեցել մարզական յոթերորդ փառատոնի փակման և մրցանակակիրների պարգևատրման արարողությունը:

Հայաստանի ազգային պարալիմպիկ հանձնաժողովի կողմից կազմակերպված փառատոնը մեկնարկել էր Երևանում հունիսի 22-ին: Փառատոնի ընթացքում ՀՀ տարբեր մարզերից ժամանած շուրջ 70 հաշմանդամ-մարզիկներ ուժերը չափեցին վեց մարզաձևում՝ լող, ծանրամարտ, բազկամարտ, բասկետբոլ, շախմատ և թենիս:

Պարգևատրման արարողության ժամանակ մրցանակակիրներին հանձնվեցին մեդալներ, դիպլոմներ և մասնակցության հավաստագրեր:

Շախմատի կատեգորիայում առաջին տեղը զբաղեցրել է Յուրի Ավետիսյանը, երկրորդը՝ Իշխան Մկրտչյանը, երրորդը՝ Ռաֆիկ Ազարյանը:

Բասկետբոլի կատեգորիայում մրցանակների են արժանացել Մարինե Ասատրյանը, Հունան Հունանյանը, Փոլ Մարգարյանը, Սևակ Մխիթարյանը, Կարեն Ավետիսյանը, Սամվել Սարդարյանը, Հայկ Գրիգորյանը, Արշակ Հովհաննիսյանը:

Բազկամարտի կատեգորիայում մրցանակակիրների թվում են հայտնվել Հարություն Մխիթարյանը, Ռոման Աղաբայանն ու Ալեքսան Բայանդուրյանը:

Ծանրամարտի կատեգորիայում ուժերը չափել են մինչև 60 կգ քաշային կատեգորիայում առաջին տեղը զբաղեցրած Մարինե Ազատրյանը և մինչև 100 կգ քաշային կատեգորիայում առաջին տեղը զբաղեցրած Սամվել Ասատրյանը:

Սեղանի թենիսից գրանցվել են հետևյալ արդյունքները՝ կանանց շրջանում առաջին տեղը զբաղեցրել է Անահիտ Վարդանյանը, երկրորդ տեղը՝ Լիանա Մարտիրոսյանը, երրորդ տեղը՝ Լիլիթ Բոյաջյանը:

Տղամարդկանց շրջանում առաջին տեղն է զբաղեցրել Հմայակ Ավետիսյանը, երկրորդ տեղը՝ Արթուր Գալադյանը և երրորդ տեղը՝ Պետրոս Գեզակյանը:

Լողի կատեգորիայում առաջին տեղին է արժանացել Արամ Սարգսյանը, երկրորդ և երրորդ տեղերը համապատասխանաբար զբաղեցրել են Մարիամ Սահակյանն ու Միլիտոն Թորոսյանը:

Փառատոնի փակման արարողության ժամանակ Հայաստանի պարալիմպիկ կոմիտեի նախագահ Հակոբ Աբրահամյանը նշեց, որ տարեցտարի փառատոնն անցկացվում է ավելի բարձր մակարդակով, նա հույս հայտնեց, որ հաջորդ տարի այն կդառնա տարածաշրջանային, և փառատոնին, բացի հայ մարզիկներից, կմասնակցեն նաև հարևան երկրների մարզիկները:-0-