Բարձրաստիճան հայ պաշտոնյաներն առանց ամառային երկարատև արձակուրդի կմնան. վարչապետ

Բարձրաստիճան պաշտոնյաներն այս ամառ երկարատև արձակուրդի գնալու իրավունք չունեն, ասաց ՀՀ վարչապետ Տիգրան Սարգսյանը:

«Այժմ բարձրաստիճան պաշտոնյաններն արձակուրդի դիմումներ են գրում, և ինձ զարմացնում է այն, որ բոլորը դիմումները գրում են մեկ ամսով արձակուրդ տրամադրելու մասին: Այնպիսի տպավորություն է, որ որևէ արտառոց բան տեղի չի ունենում, և մենք չենք գտնվում ծանր պայմաններում, արդեն հաղթահարել ենք տնտեսական և ֆինանսական ճգնաժամը, և ՀՀ կառավարությանը ծանր աշխատանք չի սպասվում: Նման մոտեցումն անընդունելի է», - հայտարարեց վարչապետը հինգշաբթի կառավարության նիստի ժամանակ:

Սարգսյանն ընդգծեց, որ եթե բարձրաստիճան պաշտոնյաներն այս ամառ արձակուրդ գնան, ապա այն կլինի կարճատև և կանցնի բացառապես Հայաստանում:

«Խնդրում եմ չներկայացնել դիմումներ մեկ ամսով արձակուրդ տրամադրելու մասին: Փոխանցեք ձեր տեղակալներին և վարչությունների ղեկավարներին, որ այս տարի նրանք մեկամսյա արձակուրդ չեն ստանա», - նախարարներին դիմեց ՀՀ վարչապետը:

Վարչապետն ասաց, որ նախարարների կաբինետն ամառային սեզոնը պետք է գնահատի՝ որպես լարված աշխատանքի ամիս: «Մենք իրավունք չունենք ասելու, որ կառավարության համար սկսվել է հանգստի փուլը, ընդհակառակը՝ մեզ համար սկսվում է ամենաբարդ աշխատանքը: Եթե մենք կարողանանք ղեկավարվել այս սկզբունքով, ապա տարեվերջին դրական արդյունքներ կտեսնենք», - ընդգծեց ՀՀ վարչապետը:

Սարգսյանի խոսքերով, Հայաստանի տնտեսական ցուցանիշներն այս տարի բարենպաստ չեն, իսկ 2009թ.-ը կառավարության համար ամենադժվարին տարին է, որը պետք է ակտիվ աշխատանք իրականացնի իրավիճակը շտկելու համար:

Միաժամանակ վարչապետը նշեց, որ Հայաստանում տնտեսական անկումը որոշակի աստիճանով պայմանավորված է նաև տեխնիկական ռեցեսիայով, քանի որ 2008 թ.-ի առաջին վեց ամսում տնտեսական աճի բարձր տեմպեր են գրանցվել:

«Սակայն մենք չպետք է բավարարվենք նման բացատրություններով և պարտավոր ենք շարունակել աշխատանքը», - հայտարարեց Սարգսյանը:

2009 թ.-ի հունվար-ապրիլ ամիսներին հայկական տնտեսության մեջ 9,7 տոկոսանոց անկում գրանցվել է՝ 2008 թ.-ի նույն ժամանակահատվածի համեմատ: Հաշվետու ժամանակաշրջանում ՀՆԱ-ի ծավալը ընթացիկ գներով կազմել է 638939,3 միլիոն դրամ, իսկ ՀՆԱ-ի ինդեքս-դեֆլյատոր ցուցանիշը ընթացիկ տարվա հունվար-ապրիլ ամիսներին, 2008 թ.-ի նույն ժամանակահատվածի համեմատ, կազմել է 101,8 տոկոս:-0-