Orange ընկերության մուտքը հայկական շուկա նոր հնարավորություններ կբացի բջջային ինտերնետի օգտագործման համար։ Այս մասին Երևանում լրագրողներին տեղեկացրեց Orange ֆրանսիական ընկերության Եվրոպայի գծով փոխնախագահ Օլաֆ Սուանտին։
Նրա խոսքերով՝ Հայաստանում բջջային շուկայի կենտրոնացումը բավականին մեծ է և կազմում է շուրջ 80 տոկոս, միաժամանակ գրանցված է ինտերնետի օգտագործման բավականին ցածր ցուցանիշ, որը չի գերազանցում 25 տոկոսը։
Միաժամանակ Սուանտին Հայաստանում բջջային ինտերնետի օգտագործումը «շատ թույլ» բնոորոշեց։
«Այս առնչությամբ մենք կարծում ենք, որ Orange-ի մուտքը հայկական շուկա նոր հնարավորություններ կբացի բջջային ինտերնետի օգտագործման համար», -ասաց նա։
Պատասխանելով ինտերնետ-հասանելիության ապահովման համար օպտիկամանրաթելային ուղիների օգտագործման աղբյուրների մասին հարցին՝ նա նշեց, որ դեռևս չի կարող հրապարակել նման տեղեկատվություն։
«Ես կարող եմ միայն նշել, որ տվյալ պահի դրությամբ շարունակվում են առավել որակյալ ինտերնետի տրամադրման առավել օպտիմալ տարբերակի որոնման վերաբերյալ քննարկումները», - ասաց Սուանտին։
France Telecom ընկերությանը (ապրանքանիշը՝ Orange, գրանցված է «ՖՏԱ-Տելեկոմ» անվան տակ) վերջնական լիցենզիան ստացել է 2008 թ.-ի նոյեմբերի 19-ին: Լիցենզիան տրամադրվել է 15 տարի ժամկետով՝ ևս 15 տարի երկարացման իրավունքով։ Ընկերությանը թույլատրվել է համարներ տրամադրել +374(0)55 և +374(0)95 կոդերով, տասը տարի ժամկետով համարների փոխարինման իրավունքով։
Հոկտեմբերի 7-ին մրցութային հանձնաժողովը որոշում կայացրեց Հայաստանում շարժական կապի գլոբալ համակարգի ծառայությունների մատուցման երրորդ օպերատորին գործունեության լիցենզիա և ռադիոհաճախականությունների օգտագործման թույլտվություն տրամադրելու նպատակով հայտարարված մրցույթի հաղթող ճանաչել ֆրանսիական Orange ընկերությանը: Orange (France Telecom օպերատորի գլխավոր ապրանքանիշ) ընկերությունը GSM լիցենզիայի ստացման համար ամենախոշոր առաջարկն էր ներկայացրել՝ 51,5 մլն եվրոյի չափով։
Մինչև երրորդ օպերատորի մուտքը հայկական շուկայում գործում էին բջջայինն կապի երկու ընկերություններ՝ «ԱրմենՏելը», որը 100 տոկոսով պատկանում է ռուսական «ՎիմպելԿոմ»-ին և VivaCell-MTS-ը, որի բաժնետոմսերը պատկանում են MTS ռուսական ընկերությանը։ -0-
