ԵՐԵՎԱՆ, 10 հունիսի. /Նովոստի-Արմենիա/. Մասնագիտական կրթության և ուսուցման ոլորտներում սոցիալական գործընկերության ծրագիրն է մեկնարկել Հայաստանում չորեքշաբթի պետական մակարդակում։
«Երկամյա պլանավորումից հետո հայաստանյան բոլոր ուսումնարաններում և քոլեջներում ներդրվել է երկկողմանի սոցիալական երկխոսության նոր մոդել մասնագիտական կրթություն և ուսուցում իրականացնող անձանց, ինչպես նաև գործատուների և արհմիությունների ներկայացուցիչների համախմբման ճանապարհով»,- ասաց ՀՀ կրթության և գիտության փոխնախարար Արա Ավետիսյանը։
ՀՀ ԿԳ նախարարության և Եվրամիության աջակցությամբ իրականացված ծրագրի մեկնարկը տրվեց ՀՀ կրթության և գիտության նախարարության ու ԵՄ Կրթության եվրոպական հիմնադրամի համագործակցության շրջանակներում կազմակերպած միջազգային սեմինարի ընթացքում։
Մասնագիտական կրթության և ուսուցման ոլորտում սոցիալական գործընկերության նպատակն է զարգացնել երկխոսությունը կրթության և աշխատաշուկայի միջև։
«Մենք բարձր որակավորում ունեցող աշխատողների աճող պահանջարկ ունենք տնտեսության նոր զարգացող հատվածներում, և մեզ անհրաժեշտ է որքան հնարավոր է արագ ապահովել աշխատաշուկայի կարիքները»,- հայտարարեց փոխնախարար Արա Ավետիսյանը։
Նա նշեց, որ իրավիճակը կարելի է բարելավել բոլոր կողմերի միջև միայն բաց և ակտիվ երկխոսության միջոցով։
Ավետիսյանի խոսքով՝ ծրագրի շրջանակներում տեղական մակարդակում բոլոր պետական մասնագիտացված քոլեջները կկատարելագործվեն և կունենան իրենց սեփական եռակողմ կառավարման խորհուրդները:
Ձեռնարկությունների կառավարման խորհուրդների հնարավորությունների բարելավման նպատակով կկազմակերպվի հատուկ ուսուցում։ Ուսուցման առաջին փուլը, որն ապահովում է Կրթության եվրոպական հիմնադրամը, կիրականացվի հունիսի 11-ին և 12-ին Վանաձորի Ս.Մատինյանի անվան պետական տեխնոլոգիական քոլեջում։
Կրթության եվրոպական հիմնադրամը ստեղծվել է 1994 թվականին։ Գործելով ԵՄ անունից՝ այն աջակցություն է ցուցաբերում գործընկեր պետություններին՝ կրթության և ուսուցման որակյալ համակարգերի ստեղծման և դրանք գործնականում ներդնելու գործում։ -0-
