Իրան-Հայաստան երկաթուղու կառուցումը կբարձրացնի Հայաստանի տնտեսական անվտանգությունը. վարչապետ

Իրան-Հայաստան երկաթուղու կառուցումը կբարձրացնի Հայաստանի տնտեսական անվտանգությունը, կարծում է ՀՀ վարչապետ Տիգրան Սարգսյանը։

«Մենք նվազ խոցելի կլինենք տնտեսական և քաղաքական տեսանկյուններից»,- ուրբաթ ասաց Սարգսյանը՝ պատասխանելով «Ֆինանսաբանկային քոլեջ» հիմնադրամի կողմից կազմակերպած «Ճգնաժամը որպես հնարավորություն» երիտասարդ մասնագետների համար նախատեսված դասախոսությունների շարքի մասնակիցների հարցերին։

Իրան-Հայաստան երկաթուղու շինարարության մասին վերջնական հուշագիրը Թեհրանում ստորագրեցին Իրանի ճանապարհների և հաղորդակցությունների նախարար Համիդ Բիհբահանին և ՀՀ տրանսպորտի նախարար Գուրգեն Սարգսյանը ընթացիկ տարվա ապրիլի 13-14-ը ՀՀ նախագահ Սերժ Սարգսյանի գլխավորած պատվիրակության Իրան կատարած այցի շրջանակներում։

Իրանի կողմի հավաստմամբ, շինարարության ողջ գործընթացը կտևի 5,5 տարի, իսկ նախագծի ընդհանուր ծախսերը 1-1,2 մլրդ ԱՄՆ դոլար կկազմեն։ 

Երկաթուղու երկարությունը 470 կմ կլինի, որից 60 կմ-ը կանցնի Իրանի, իսկ մնացած 410 կմ-ը՝ Հայաստանի տարածքով։

Տվյալ երկաթուղին թույլ կտա Հայաստանին օգտվել էներգետիկ ռեսուրսներ և այլ ապրանքներ փոխադրելու այլընտրանքային ուղուց՝ ելք ունենալով դեպի արտաքին աշխարհ, մինչդեռ այժմ Հայաստանի երկաթուղային հաղորդակցությունն իրականացվում է միայն Վրաստանի միջով։ --0—