Երևանում տեղի ունեցավ «Իրավական պաշտպանությունը ճանապարհներին» ծրագրի ամփոփիչ զեկույցի շնորհանդեսը

ԵՐԵՎԱՆ, 26 մայիսի. /Նովոստի-Արմենիա/. Երեքշաբթի Երևանում տեղի ունեցավ USAID-ի Հակակոռուպցիոն գործողությունների մոբիլիզացման ծրագրի շրջանակներում «Աքիլես» ՀԿ-ի կողմից իրականացվող «Իրավական պաշտպանությունը ճանապարհներին» ծրագրի ամփոփիչ զեկույցի շնորհանդեսը։

«Ծրագրի հիմնական նպատակը «տեսուչ-վարորդ» վիճաբանության մեջ ներքաշված ավտովարորդին որակյալ իրավական օգնության ցուցաբերումն է»,- լրագրողներին ասաց վարորդների իրավունքների պաշտպանության «Աքիլես» կազմակերպության նախագահ Էդուարդ Հովհաննիսյանը։

Նա նշեց, որ իրենց առջև դրված խնդրի արդյունավետության բարձրացման համար փետրվարի 1-ից գործարկվել է թեժ գիծ, որով վարորդները կարող են պրոֆեսիոնալ խորհուրդներ ստանալ կազմակերպության փաստաբաններից, ինչպես նաև տեղում անհրաժեշտ իրավական օգնություն ստանալ։

«Այս ընթացքում Ճանապարհատրանսպորտային ոստիկանության կողմից թույլ տրված մեծ թվով իրավախախտումներ են հայտնաբերվել»,- նշեց Հովհաննիսյանը։

Այսպես՝ կազմակերպության անցկացրած մոնիտորինգի արդյունքում  իրավախախտումների 29 տոկոսը փոխադրամիջոցներից անօրինական կերպով համարները հանելու հետ կապված խախտումներն են կազմում, 24,5 տոկոսը իրավախախտման փաստի հետ վարորդի անհամաձայնության և 10 տոկոսը՝ կաշառք վերցնելու փաստի հետ։  

Հովհաննիսյանը նշեց նաև, որ ծրագիրը հնարավորություն է տվել հայտնաբերել կոռուպցիոն ռիսկերի առկայությունը ՃՏՈ գրեթե բոլոր ստորաբաժանումներում, որոնց մեծամասնությունը՝ 83 տոկոսը, բաժին է ընկնում ճանապարհային պարեկի ստորաբաժանմանը։   

«Աքիլես» ՀԿ նախագահի կարծիքով՝ տվյալ ծրագիրն էապես ազդել է վարորդների՝ սեփական դերի ու նշանակության վերագնահատման վրա ճանապարհային տեսուչների հետ փոխհարաբերություններում։ Վարորդն այժմ մեծ վստահությամբ է վերաբերվում վեճը իրավական ճանապարհով լուծելու հնարավորությանը, և կազմակերպության փաստաբանների օգնությամբ դատական կարգով հաջողվեց վերկանգնել 25 վարորդների խախտված իրավունքները։   

Իր հերթին USAID հակակոռուպցիոն գործողությունների մոբիլիզացման ծրագրի ղեկավար Ֆրանսուա Վեզինը բարձր գնահատեց «Աքիլեսի» դերը և պատրաստակամություն հայտնեց այսուհետ ևս աջակցել նրանց կազմակերպելու այս ոլորտում կաշառակերության դեմ պայքարին ուղղված ծրագրերի իրականացումը։  

Վեզինը նաև հատուկ նշեց կազմակերպության դերը օրենսդրական ոլորտում վարորդների գիտելիքների մակարդակի բարձրացման գործում։ -0-