ՀՀ նախագահը հոբելյանի առթիվ շնորհավորել է «Ժողովուրդների բարեկամություն» ամսագրի խմբագրությանը
ՀՀ նախագահը շնորհավորել է «Ժողովուրդների բարեկամություն» («Дружба народов») ամսագրի խմբագրությանը 70-ամյա հոբելյանի առթիվ, «Նովոստի-Արմենիա» գործակալությանը հայտնեց ԱՊՀ անդամ պետությունների մարդասիրական համագործակցության միջպետական հիմնադրամի մամուլի քարտուղար Ալեքսանդր Կալուգինը։
Այս օրերին «Ժողովուրդների բարեկամություն» գրական-գեղարվեստական և հասարակական-քաղաքական ամսագիրը նշում է 70-ամյա հոբելյանը։ 1939 թվականին Մաքսիմ Գորկու նախաձեռնությամբ հիմնադրված ամսագիրը միշտ իր շուրջն է համախմբել առավել տաղանդավոր հեղինակների և նպաստել է ազգային գրականությունների մերձեցմանը։ Ամսագրում հրապարակած շատ նյութեր ընդգրկվել են ժամանակակից գրականության գանձարանում։
«Ձեր ամսագիրը, որի հետ անմիջականորեն կապված են տարբեր ժողովուրդների գրականության ներկայացուցիչները, դարձել է մշակույթների ուրույն խաչմերուկ»,- ասվում է ՀՀ նախագահի՝ ամսագրի խմբագրությանն ուղղված ողջույնի ուղերձում։
«Հայաստանի գրական շրջանակները և ընթերցողները միշտ երախտագիտությամբ են վերաբերվել «Ժողովուրդների բարեկամություն» ամսագրին։ Շնորհիվ այդ ամսագրի, մեր գրողներից շատերը ճանաչում են ձեռք բերել ոչ միայն նախկին Խորհրդային Միությունում, այլ նաև նրա սահմաններից դուրս։ Այս ավանդույթը շարունակվում է առայսօր՝ դռներ բացելով փոխըմբռնման և մարդասրիրական տարածքի ընդլայնման համար»,- նշեց Սարգսյանը։
«Ժողովուրդների բարեկամության» հասցեին բազմաթիվ շնորհավորանքներ և ողջույններ են ստացվում, այդ թվում՝ ԱՊՀ անդամ-պետությունների նախագահներից, ովքեր ընդգծում են այդ պարբերականի դերը միջմշակութային երկխոսության և Համագործակցության երկրների ազգային գրականությունների զարգացման գործում։
2008 թվականին ԱՊՀ անդամ պետությունների մարդասիրական համագործակցության միջպետական հիմնադրամի աջակցությամբ ամսագիրը վերսկսեց «Ժողովուրդների բարեկամության» գրադարանը՝ հրապարակելով Համագործակցության պետությունների ժամանակակից լավագույն արձակագիրների վեց գիրք, ինչպես նաև լույս տեսավ ամսագրի հոբելյանական համարը։
Այսօր երեկոյան Մոսկվայում կանցկացվի «Ժողովուրդների բարեկամության» հոբելյանական երեկոն, որին կմասնակցեն ԱՊՀ անդամ-պետությունների, ՌԴ Դաշնային Ժողովի, ՌԴ մշակույթի նախարարության, միջազգային և հասարակական կազմակերպությունների ներկայացուցիչներ։ -0-
