Իրանից Հայաստան կներկրվի 20 հազար տոննա ազոտային պարարտանյութ, չորեքշաբթի հայտնեց Ագրարագյուղացիական միության ղեկավար Հրաչ Բերբերյանը։ «Մենք դեկտեմբերին խոստացել ենք, որ Հայաստան կներկրվի բարձրորակ ազոտային պարարտանյութ, և կարող եմ հայտնել, որ այսօր արդեն Երևանում է գտնվում 850 տոննա պարարտանյութ»,- հայտարարեց նա։
Բերբերյանի խոսքերով ամեն օր Հայաստան կմտնի 500-800 տոննա պարարտանյութ, իսկ ընդհանուր առմամբ կբերվի 20 հազար տոննա։ Նա ընդգծեց, որ ներկրվող պարարտանյութը շատ բարձր որակ ունի, և համապատասխանում է միջազգային բոլոր չափանիշներին։
Միության ղեկավարը նշեց, որ ներկրվող պարարտանյութի գինը մոտավորապես 1500 դրամով պակաս կլինի (շուրջ 4 դոլար) շուկայում առկա գներից, որն այժմ մեկ պարկի համար 8000 դրամ է կազմում (21,4 ԱՄՆ դոլար)։ Նա նշեց, որ ապագայում գինը կիջեցվի։
Բերբերյանը հայտնեց, որ պարարտանյութ գնելու համար Ագրարագյուղացիական միությունը դրամ է հավաքել իր տեղական ու գյուղական կազմակերպությունների օգնությամբ։ Բացի այդ, միությանը օգնել են իր գործընկերները, որոնք ֆինանսավորել են պարտիայի կանխավճարը, սակայն նրանց անունները Բերբերյանը չբացահայտեց՝ խոստանալով այդ մասին հայտնել ավելի ուշ։
Ագրարագյուղացիական միության նախագահը հատկապես նշեց Վրաստանի դիրքորոշումը պարարտանյութի տարանցման հարցում։ Նա հայտնեց, որ վրացական իշխանությունները մեկուկես ամիս արգելում էին պարարտանյութի տարանցումն իրենց երկրի տարածքով, որի նպատակն էր ստիպել հայ ֆերմերներին վրացական պարարտանյութ օգտագործել։ «Եթե իրանական տարբերակը չլիներ, ես վստահ եմ, որ կկրկնվեր անցյալ տարվա իրավիճակը, պարարտանյութի շուկայական գինը 10 հազար դրամ կկազմեր (26,8 ԱՄՆ դոլար)»,- հայտարարեց նա։
Բերբերյանի խոսքերով, իրենց նպատակը շուկայում մրցակցություն ստեղծելն է, որպեսզի հայրենական արտադրանքի ի հայտ գալուց հետո էլ գյուղացին կարողանա ընտրել գոնե պարարտանյութի երկու տեսակի միջև, ոչ թե օգտագործի միայն վրացական արտադրության պարարտանյութ։ Մենք ուզում ենք ազատ շուկայի հոգեբանություն ստեղծել։ Թող հաղթի ավելի մրցունակը»,- ամփոփեց նա։
Միևնույն ժամանակ Բերբերյանը նշեց բացառապես ազոտային պարարտանյութ օգտագործելու վտանգը՝ ազոտային պարարտանյութի մասսայականությունը գյուղացիների շրջանում բացատրելով ֆոսֆորայինի ու կալիումայինի համեմատ դրանց ավելի էժան լինելով։
Ագրարագյուղացիական միության նախագահը հայտնեց, որ 2008թ.-ին Հայաստանի գյուղատնտեսության մեջ 36 հազար տոննա ազոտային պարարտանյութ է օգտագործվել։ -0-
