ԵՐԵՎԱՆ, 5 մայիսի. /Նովոստի-Արմենիա/. Հայ-թուրքական «ճանապարհային քարտեզ» գոյություն չունի, քանի որ նման փաստաթղթեր չեն պատրաստվում երկու-երեք օրվա ընթացքում, կարծում է հայ քաղաքագետ Լևոն Մելիք-Շահնազարյանը։
«Հրապարակվել է միայն Հայաստանի և Թուրքիայի բարի կամքն արտահայտող հայտարարություն երկկողմ հարաբերություններ հաստատելու վերաբերյալ»,- երեքշաբթի լրագրողներին ասաց Մելիք-Շահնազարյանը։
Նրա խոսքերով՝ այդ հայտարարությունն առաջին հերթին պետք էր Թուրքիային Եվրոպայի հետ հարաբերությունները բարելավելու համար։
«Դա պետք էր Թուրքիային հենց ապրիլի 24-ի նախօրեին ԱՄՆ-ին և մյուս երկրներին ցույց տալու համար, որ Հայաստանի և Թուրքիայի միջև կա հարաբերությունների բարելավման առաջընթաց, և պետք չէ խանգարել դրանց զարգացմանը»,- ասաց Մելիք-Շահնարզարյանը։
Քաղաքագետի կարծիքով՝ Հայաստանը համատեղ հայտարարության համար ընտրել է ամենաանպատեհ պահը:
Հայաստանի և Թուրքիայի միջև չկան դիվանագիտական հարաբերություններ, իսկ 1993-ից, պաշտոնական Անկարայի նախաձեռնությամբ, փակ է հայ-թուրքական սահմանը։
Պաշտոնական Երևանը հայտարարում է, որ պատրաստ է հարաբերություններ հաստատել Թուրքիայի հետ՝ առանց նախապայմանների։ Սակայն Թուրքիան երկկողմ հարաբերությունների հաստատաման համար առաջ է քաշում մի շարք նախապայմաններ, մասնավորապես, Հայաստանի կողմից Օսմանյան Թուրքիայում 1915թ. իրագործված Եղեռնի ճանաչմանն ուղղված ջանքերից հրաժարվելը և ղարաբաղյան հիմնախնդրի լուծումը` հօգուտ Ադրբեջանի:
Առաջին քայլերը հարաբերություններում արվեցին 2008թ. սեպտեմբերի 6-ին, երբ Թուրքիայի նախագահ Աբդուլա Գյուլն առաջին անգամ ՀՀ նախագահ Սերժ Սարգսյանի հրավերով այցելեց Երևան՝ 2010 թ. աշխարհի առաջնության ընտրական փուլի շրջանակներում երկու երկրների հավաքականների միջև ֆուտբոլային հանդիպումը դիտելու համար։ Այցի ընթացքում երկու պետությունների ղեկավարները քննարկեցին երկկողմ հարաբերությունների հաստատման հնարավորությունները։-0-
