Հայաստանի նախագահը ստեղծել է միջգերատեսչական հանձնաժողով՝ ստվերային տնտեսության դեմ պայքարի նպատակով
«Հանձնաժողովի կազմում ընդգրկված են նախագահի աշխատակազմի, կառավարությանն առընթեր Մաքսային պետական կոմիտեի, Ոստիկանության, Ազգային անվտանգության ծառայության, Գլխավոր դատախազության ներկայացուցիչներ»,-«Նովոստի-Արմենիա» գործակալությանը հայտնեցին երկրի նախագահի մամուլի ծառայությունից:
Նախօրեին միջգերատեսչական հանձնաժողովի անդամների մասնակցությամբ կայացած աշխատանքային հանդիպման ժամանակ նախագահ Քոչարյանն ասել է, որ նման հանձնաժողով ստեղծելու անհրաժեշտությունն առաջացել է հարկային քաղաքականության խստացման ուղղությամբ վերջերս տեղի ունեցած մի շարք խորհրդակցություններից հետո:
«Նշելով, որ հանձնաժողովը հետևողական քայլերով և բոլոր շահագրգիռ պետական կառույցների ներգրավմամբ պետք է լուրջ պայքար ծավալի ստվերային շրջանառության դեմ, նախագահն ընդգծել է, որ համախառն ներքին արդյունքի մեջ հարկային եկամուտների տոկոսը պետք է լինի այնպիսին, ինչպիսին քաղաքակիրթ երկրներում է»,- հայտնեցին մամուլի ծառայությունից։:
Ըստ երկրի ղեկավարի, հանձնաժողովն իր գործունեությամբ պետք է լուրջ ազդակ հաղորդի, որ «չկան անձեռնմխելի մարդիկ, ոլորտներ և որևէ տանիք որևէ մեկի համար չի կարող ծառայել, պետք է աշխատել միմիայն օրինական դաշտում»:
Նախագահի խոսքով, այսօր կան երևույթներ, որոնք չեն կարող լինել առանց պետական կառույցների հովանավորչության:
«Հովանավորչություն իրականացնողները պետք է բացահայտվեն և պատժվեն օրենքի ամբողջ խստությամբ»,-շեշտել է նա:-0-
