ԵՐԵՎԱՆ, 12 մարտի./Նովոստի–Արմենիա/. ՌԴ ԱԳՆ պաշտոնական ներկայացուցիչ Մարիա Զախարովան ձեռնպահ է մնացել մեկնաբանել Ադրբեջանի նախագահ Իլհամ Ալիևի հայտարարությունն այն մասին, որ «Զանգեզուրն Ադրբեջանի տարածքն է»։
Հայաստանի հանրային հեռուստաընկերության լրագրողը ճեպազրույցի ընթացքում խնդրել է Զախարովային մեկնաբանել է Ադրբեջանի նախագահի հայտարարությունը, որն արվել է մարտի 5–ին` Տնտեսական համագործակցության կազմակերպության անդամ երկրների առցանց հանդիպման ժամանակ։ Ալիևը հայտարարել է, որ «Զանգեզուրն Ադրբեջանի տարածքն է»։ Զախարովային հարց են տվել, թե, արդյոք, նա չի՞ կարծում, որ Զանգեզուրի մասին Ալիևի հայտարարությունը միջազգային իրավունքի կոպիտ խախտում է և ոտնձգություն Հայաստանի միջազգայնորեն ճանաչված սուվերեն սահմանների նկատմամբ, այդ հայտարարությունն, արդյոք, չի՞ խախտում նոյեմբերի 9–ին ստորագրված եռակողմ հայտարարությունը, որը վերաբերում է տարածաշրջանային տրանսպորտային հաղորդակցությունների և ուղիների ապաշրջափակմանը։
«Մենք ընդհանուր առմամբ նկատում ենք կառուցողական տրամադրվածություն, որը դրսևորում են և Բաքուն, և Երևանը եռակողմ աշխատանքային խմբի շրջանակում` Ռուսաստանի, Հայաստանի և Ադրբեջանի փոխվարչապետերի նախագահությամբ», – ասել է Զախարովան։
Նա ընդգծել է, որ խմբի գլխավոր խնդիրն է բարձրագույն մակարդակում ձեռք բերված պայմանավորվածությունների իրագործումը, որոնք վերաբերում են տարածաշրջանում բոլոր տնտեսական և տրանսպորտային կապերի ապաշրջափակմանը։
«Հույս
ունենք, որ դրականին ուղղված նույնանման նպատակաուղղվածությունն ու շփման փոխընդունելի
կետերի որոնումը կգերակշռեն ինչպես պաշտոնական մեկնաբանություններում, այնպես էլ
Հայաստանի և Ադրբեջանի մեդիատարածքում», – ասել է ՌԴ ԱԳՆ ներկայացուցիչը։–0–
