ԵՐԵՎԱՆ, 29 դեկտեմբերի./Նովոստի–Արմենիա/. Ամերիկացի կոնգրեսական Ֆրենկ Փալոնը մեկնաբանել է ԱՄՆ նախագահի ստորագրած օրենքը, որը վերաբերում է 2022թ.–ի ազգային պաշտպանությանը։
«Ազգային պաշտպանության օրենքը, որը ստորագրել է նախագահ Բայդենը, ներառում է կարևոր դրույթներ, որոնք ուղղված են Ադրբեջանի և Թուրքիայի կողմից Արցախում կատարված ռազմական հանցագործությունների համար պատասխանատվության ենթարկվելուն։ Ես պնդելու եմ պահանջված զեկույցների հստակության ապահովումը այդ հանցագործությունների փաստագրման ժամանակ», – գրել է Փալոնը
Twitter–ի իր էջում։
ԱՄՆ նախագահ Ջո Բայդենը դեկտեմբերի 27–ին ստորագրել է «Ազգային պաշտպանության օրենքը» (NDAA), որի շրջանակում պաշտպանական կարիքների համար Վաշինգտոնը 2022թ.–ին կհատկացնի 770մլրդ դոլար։
Կոնգրեսականի պահանջը
Ավելի վաղ ԱՄՆ կոնգրեսի անդամ Ադամ Շիֆը պահանջել էր ամերիկյան վարչակազմից հրաժարվել Ադրբեջանին օգնություն տրամադրելուց Արցախի և Հայաստանի դեմ իրականացրած ագրեսիայի պատճառով։ Շիֆն ընդգծել է, որ 44–օրյա պատերազմն առաջացրել է զանգվածային հումանիտար աղետ, ինչի հետևանքով զոհվել են հազարավոր մարդիկ, տասնյակ հայ զինծառայողներ մնում են Ադրբեջանի գերության մեջ և ենթարկվում տանջանքների։–0–