Արցախի ՊՆ–ն հերքում է արցախյան ուժերի շտաբի վրա հասցված հարվածի մասին Բաքվի տեղեկատվությունը

ՍՏԵՓԱՆԱԿԵՐՏ, 2 մարտի. /Նովոստի–Արմենիա/. Մարտունու շրջանում արցախյան ուժերի շտաբի վրա հասցված հարվածի մասին Ադրբեջանի տեղեկատվությունը չի համապատասխանում իրականությանը, «Նովոստի–Արմենիա» գործակալությանն ասաց Արցախի Հանրապետության ՊՆ մամուլի քարտուղար Սենոր Հասրաթյանը։

«Տարածված տեղեկությունները չեն համապատասխան իրականությանը, դրանք ադրբեջանական կողմի հերթական ապատեղեկատվությունն են», – ասաց Հասրաթյանը։

Ինչ վերաբերում է Ադրբեջանի կողմից տարածած տեսանյութին, ապա, Հասրաթյանի խոսքով, այն կարող էր նկարահանված լինել նախորդ տարի ապրիլյան մարտերի ընթացքում։

Ղարաբաղյան հակամարտությունը սկիզբ է առել 1988 թ.-ին, երբ հիմնականում հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին։ 1991 թ. դեկտեմբերի 10-ին, Խորհրդային Միության փլուզումից մի քանի օր առաջ, Լեռնային Ղարաբաղում տեղի ունեցավ հանրաքվե, որի ժամանակ բնակչության ճնշող մեծամասնությունը՝ 99,89 տոկոսը Ադրբեջանից ամբողջովին անկախանալու կողմ քվեարկեց։

Դրանից հետո սկսվեցին լայնամասշտաբ ռազմական գործողություններ, որոնց հետևանքով Ադրբեջանը կորցրեց վերահսկողությունը Լեռնային Ղարաբաղի և նրան հարակից յոթ շրջանների նկատմամբ։

1994 թ.-ի մայիսի 12-ին՝ զինադադարի մասին համաձայնագրի ուժի մեջ մտնելուց հետո հակամարտության գոտում դադարեցին ռազմական գործողությունները։ Պատերազմի հետևանքով երկու կողմից զոհվեց մոտավորապես 25-30 հազ մարդ և մոտ մեկ միլիոնը ստիպված եղավ լքել բնակավայրերը։

Զինադադարի ռեժիմի մասին համաձայնությունը պահպանվում է մինչ այժմ։ 1992 թ.-ից մինչ օրս ընթանում են բանակցություններ հակամարտության խաղաղ կարգավորման ուղղությամբ ԵԱՀԿ Մինսկի խմբի շրջանակում։–0–