Հայտնի է դարձել, թե ում BMW են պայթեցրել Վարդենիսում (ԼՈՒՍԱՆԿԱՐ, ՏԵՍԱՆՅՈՒԹ)

ԵՐԵՎԱՆ, 24 մայիսի. /Նովոստի–Արմենիա/. Քիչ առաջ հաղորդվել էր, որ չորեքշաբթի` մայիսի 24–ին, արտակարգ դեպք է տեղի ունեցել Վարդենիսում։

Ըստ քննչական կոմիտեի նախնական տվյալների, ժամը 04:00-ի սահմաններում, Վարդենիս քաղաքի բնակիչներից մեկի բակում տեղի է ունեցել պայթյուն, որի հետևանքով վնասվել են բակում կայանված «BMW 525i» մակնիշի ավտոմեքենան:

Պայթյուն է որոտացել Վարդենիսում. հարուցվել է քրեական գործ>>

Ինչպես հայտնում է shamshyan.com կայքը, ժամը 04։30-05։00-ի սահմաններում անհայտ անձը կամ անձինք դեռևս անհայտ պայթուցիչով պայթեցրել են Վարդենիսում եկեղեցու հարևանությամբ գտնվող տներից մեկի մոտ կայանված BMW մակնիշի ավտոմեքենան, որը պատկանում է նույն քաղաքի բնակիչ, 62-ամյա «Պստի Հակոբ» մականվամբ Հակոբ Սիմոնյանին։



Ըստ նախնական տեղեկությունների՝ պայթյունի հետևանքով, բարեբախտաբար, զոհեր և վիրավորներ չկան: Վնասվել է ավտոմեքենան և «Պստի Հակոբի» տան ապակիները:



Փաստի առթիվ հարուցվել է քրեական գործ:

Աղբյուրի տեղեկացմամբ, պայթյունի վարկածներից մեկը կապված է Գեղարքունիքի մարզի Զոդի ոսկու հանքի հետ։ BMW–ի տերն աշխատում է Վարդենիսի Զոդի ոսկու հանքում՝ որպես հորատման և պայթեցման աշխատանքների գծով պետի տեղակալ։ -0-