ԵՐԵՎԱՆ, 26 հոկտեմբերի. /Նովոստի-Արմենիա/. Հայաստանի հարավում ՃՏՊ–ում հայտնված ավտոբուսի ուղևորներն առաջիկայում կարող են շարունակել ճանապարհը, «Նովոստի–Արմենիա» գործակալությանը հայտնեց Սյունիքի մարզպետ Վահե Հակոբյանը։
Նա հայտնեց, որ ԱԻՆ մարզային վարչությունը ժամը 08։35–ին ահազանգ է ստացել, որ Գորիս–Կապան ավտոճանապարհի 38–րդ կիլոմետրում ավտոմեքենան շղթայի վնասվածքի պատճառով կողաշրջվել է և սահել։
«Հինգ րոպե անց դեպքի վայր է մեկնել օպերատիվ խումբը, 50 րոպե անց տեղում է եղել։ Ավտոբուսներով մարդկանց մեկ ժամից տեղափոխել են Կապանի ԱԻՆ կենտրոն, բոլորն ապահովվել են թեյով, սուրճով։ Ավելի ուշ նրանք ճաշել են»,– ասաց մարզպետը, որ ավտոբուսները տրամադրել է Սյունիքի մարզպետարանը և Զանգեզուրի պղնձամոլիբդենային կոմբինատը։
Հակոբյանը նշեց նաև, որ այս ընթացքում քարշակի օգնությամբ ավտոբուսը դուրս է բերվել կյուվետից։
«Մեքենան թեթև վնասվածքներ է ստացել, որոնք մեր նորոգողներն այժմ վերականգնում են։ Ավտոբուսն արդեն տեղափոխվել է Կապան, և իմ կարծիքով, մեկ ժամից ուղևորները կմեկնեն Իրան։ Նրանք մարզիկներ են, Իրանի քաղաքացիներ, ովքեր Երևանից վերադառնում էին մրցումներից»,– ասաց նա։
Մարզպետը միաժամանակ հայտնեց, որ ներկայում Սյունիքում օդի ջերմաստիճանը կազմում է մոտ զրո աստիճան։
«Բոլոր ճանապարհները մաքրվել են, մշակվել ռեագենտներով և ամբողջությամբ անցանելի են»,– ընդգծեց Հակոբյանը։ -0-
Ծանոթացեք լուրերին առաջինն ու քննարկեք դրանք մեր Telegram-յան ալիքում